• 26 Қаңтар, 2017

Елорда тұрғындары «Белсенді азамат» акциясына қатысты

447 рет

көрсетілді

2 мин

оқу үшін

Egemen Qazaqstan

Бүгін елорда әкімдігінің бастамасымен қала тұрғындары үшін «Астана» концерт залында ашық есік күні өтіп, оған қаланың барлық басқармаларының басшылары мен өкілдері қатысты, деп хабарлады елорда әкімдігінің баспасөз қызметі. «Белсенді азамат» акциясының шеңберінде «Өз қалаңды дамытуға үлесіңді қос» ұранымен өткен шараға елорда тұрғындары келді. Азаматтар сұрақтарын қойып, мамандардан кеңес алды және елордада өмір сүру сапасын жақсарту бойынша өз ұсыныстарын жеткізді. «Біз үшін шешім қабылдағанда немесе белгілі бір жұмыстарымызды жоспарлаған кезде қала тұрғындарының пікірлерін ескеру маңызды. Сондықтан бұл шара жемісті өтеді деп ойлаймын, тұрғындар таңертеңнен бері белсенділік танытуда, сол себепті азаматтардан түскен сұрақтарды бүгінгі күннің қорытындысы бойынша жүйелендіріп, алдағы уақытқа жұмыс жоспарын құратын боламыз»,- деп атап көрсетті Астана қаласының ішкі саясат басқармасының басшысы Ерлан Каналимов. Шара барысында қала тұрғындары өз сұрақтарын ауызша және жазбаша түрде қоя алды. Қалалық басқармалардың басшылары олардың сұрақтарына жауап беріп, кеңес айтып қана қоймай, өткен жылдың қорытындысын шығарды. Астаналықтар негізінен тұрғын үй құрылысының кезегі, жұмысқа тұру, ПИК қызметі, көлік қызметі және денсаулық сақтау саласы бойынша сұрақтар қойды. «Бізге адамдар көптеген мәселелерін айтып келеді, жақында жұмыстан шығып қалған жұмыссыздар көп, олар жұмыс іздеп келеді немесе мамандығын ауыстыруды қалайды. Біз барлық мәселелерді шешуге тырысамыз, осы жерде шешілмесе, басқармада жеке және заңды тұлғалардың өтініштерін қарау тәртібімен шешетін боламыз», - деп мәлім етті Астана қаласының жұмыспен қамту, еңбек және әлеуметтік қорғау басқармасы Қауіпсіздікті бақылау және еңбек қорғау бөлімінің басшысы Нұрлан Исекеев. Бір айта кетерлігі, елордалықтарға басқармалардың басшыларына сұрақтарын тікелей қоюға мүмкіндік беретін «Белсенді азамат» акциясы екі жылдан бері өткізіліп келеді. Шара жылына екі рет - қаңтар және ақпан айларында ұйымдастырылады. Келесі мұндай шара 8 ақпанға жоспарланған.