Халық жүрегіндегі қаламгерлер

Қазақ әдебиетіндегі cүбелі саналатын туындылардың көбі дерлік ХХ ғасырдың орта шенінен асқан кезеңде дүниеге келгені рас. Сол уақыттары қалың қазақтың әдебиет әлеміне деген қызығушылығын оятып, рухани мәдениеттің ауыр жүгін биік белеске сүйреп шығарған көрнекті ақын-жазушылардың есімін ардақтап, халық жадында жаңғыртып отыру – әрқайсымыздың да борышымыз. Осы тұста ұлттық құндылықтар мен мәдени мұраны көзінің қарашығындай сақтап келе жатқан музей қызметкерлерінің еңбегін атап өтпеуге болмас. Мемлекеттік орталық музей басшылығының ұйымдас­тыруымен қазақтың көрнекті ақын-жазушылары – Мұхтар Әуезовтің 120 жылдық, Ғабит Мүсірепов пен Ғабиден Мұста­финнің 115 жылдық, Дихан Әбілев пен Ғали Орманов­тың 110 жылдық, Әди Шәрі­повтің 105 жылдық және Әзіл­­хан Нұршайықов пен Са­фуан Шәймерденовтің 95 жыл­­­дық мерейтойлары қарса­ңында «Халық жүрегіндегі қа­лам­герлер» атты көрме ашылды. М.Әуезовтің қазақтың тұң­ғыш эпопеясы аталған «Абай жолынан» бастап, Ғ.Мүсі­репов­тің «Қазақ солдаты» (1945), «Оянған өлке» тарихи романы (1953), Ғ.Мұстафиннің соғыстан кейінгі халық өміріндегі өз­герістерді бейнелеуге ар­налған «Миллионер» повесі (1948), «Қарағанды» романы (1952), Д.Әбілевтің «Қарулас дос­тар» (1948), «Майра» (1954) драматургиялық еңбектері сияқ­ты қазақи көркем прозаны классикалық деңгейге көтеріп, қазақ әдебиетінің алтын қорына қосылған шоқтығы биік туын­дылармен қатар, майдангер қаламгерлер – Ғ.Ормановтың «Көтерме» атты әңгімелер мен очерктер жинағы, Ә.Шәріповтің «Пар­тизан қызы» (1961) романы, Ә.Нұршайықовтың «Махаббат, қызық мол жылдар», «Ақиқат пен аңыз» шы­ғармалары – оқырманын еш жоғалтпайтын мол мұра. Музейдегі көрмелердің көктемдік маусымын ашуға арқау болған айтулы көрмеге әде­биеттің түрлі жанрына қалам тартқан аталмыш ақын-жазушылардың қазақ және араб әрпімен жазылған қолжазбалары, өздеріне тиесілі жеке заттары, олардың өмірі мен шығармашылығынан сыр шертетін бірегей жеке мұрағат материалдары, сирек кездесетін фото-құжаттары, қолжазбалары мен хаттары, еңбектері мен марапаттары, әдеби мұралары мен шығармалары, сонымен қатар, бюст, афиша, плакаттар мен иллюстрациялар қойылған. Ашылуы ауқымды әдеби кеш­ке айналған көрмеде бел­гілі жазушылармен қатар, ұлы қаламгерлердің көзі тірі ұр­пақтары – Мұрат Әуезов, Жамиға Орманова, Жанар Мұс­тафина, Гүлнар Мүсі­репова, Жанар, Жанат Нұршайы­қова­лар, Индира Шәймер­де­нова, сондай-ақ, Сафуан Шәймер­деновтің жары Бағдат апа өз естеліктерімен бөлісті. Көрменің салтанатты ашы­­луында сөз алған мәде­ниет­танушы ғалым, мемлекет жә­не қоғам қайраткері Мұрат Әуезов: «Қазақтың біртуар жазушыларының мерейтойларына арналған шаралардың алғашқысын бастап, біздің ұрпақтың басын қосып, ауқым­ды шара ұйымдастырған Орталық музей ұжымына алғыс айтамын. Мерейтойлық шараларды Қытайда, Өзбекстанда да атап өту туралы ұсыныстар түсіп жатыр. Көрмені тамашалап, әкелеріміздің рухымен тілдесіп, олар ұстаған заттар арқылы өткен шақты есімізге түсіріп, толқып тұрмыз», деп ағынан жарылды. «2017 жылдың мамыр айы­на дейін жалғасатын көрмеге қызығушылық танытушылар мен келушілер қатары көбейе түссе мерзімі ұзартылады», дейді көрме қызметкерлері. Көрмеге барлығы 300 экспонат қойылған. Мира БАЙБЕК, «Егемен Қазақстан» АЛМАТЫ