Броньды «Арлан» дөңгелекті машинасы сынақтан өтті

Еліміздің Қарулы Күштері қатарындағы Құрлық әскерлерінің қару-жарақ қорына келіп түскен жаңа отандық өнім – броньды «Арлан» дөңгелекті машинасы сынақтан өтті. «Шығыс» полигонында қазақстандық броньды көліктің әскери мүмкіндіктері қысқы қатал ауа райы жағдайында тексерілді. Сынақ барысында әскери қызмет­шілер броньды машинамен ең алдымен қалың қармен жүріп өтті. Мұны Қорға­ныс министрлігінің терроризммен күрес десанттық тобы жүзеге асыр­ды. Тәжіри­беде отандық «КАЕ» кәсіпорны­ның «САРП» әскери модулінің атқыш жиынтығы пайдаланылды. Яғни, «Арлан» Калашников автоматы, Дра­гунов мылтығы және ОСВ-96 ірі калибрлі мылтығымен атқыланып, бронь­ды көліктің беріктігі тексерілді. Нәти­жесін­де, отандық өнімнің жеке құ­рам­ның қауіпсіздігін қамтамасыз ететін, өте жоғары сапалы, маневрлі және мықты қорғанысы бар екендігі дәлелденді. Айта кету керек, «Арлан» – бұл минаға қарсы қорғанысы күшейтіл­ген көп бағытты броньды дөңгелекті тех­ника. Мұндай машиналардан оңай­лықпен оқ өтпейді әрі жарылғыш зат­қа төтеп бере алады. Салмағы 16 тон­налық броньды көлік «Арланның» жыл­дамдығына келер болсақ, сағатына 100 шақырым қашықтықты басып өте алады. Тіпті, -50⁰С-тан +50⁰С-қа дейінгі температурада да бұзылмай жүре береді. «Арланның» жан-жақты электронды-оптикалық жүйесінің әскери модулі керемет жасақталған. Мамандардың айтуынша, ол жылу беретін камерамен, күндізгі көру камерасымен, лазерлік алысты өлшеуші құралмен, кез келген климаттық жағдайда, түнгі және күндізгі уақытта бақылауға, барлауға және көздеп атуға мүмкіндік береді екен. Қазақстан Қарулы Күштерінің талап­­тары мен ұсыныстарын ескерген «Қазақстан Парамаунт Инжиниринг» ЖШС-нің құрастырушы бюросының жергілікті мамандары «Арлан» броньды машинасын жасап, отандық өнім ретінде тұңғыш рет шығарып отыр. Оны техникалық сынау сәтіне журналистер арнайы шақырылды. Ал «Арлан» сынағына қатысқан «КАЕ» ЖШС – түнгі, күндізгі көру камераларын, барлау модуль­дерін, әскери радиобайланыс құралдарын жасай­­тын еліміздегі бірден-бір кәсіп­орын. «Қазақ­стан Парамаунт Инжи­ниринг» болса, әскери броньды дөңге­лекті көліктердің түр-түрін шыға­ра­тын Орта­лық Азиядағы ең ірі кәсіп­орын болып табыла­ды. Аталған кәсіп­орын­дардың біріккен іс-қимыл­дары­ның нәтижесінде «Арлан» броньды техникасы бүгінде сынақтан сәтті өтті. Раушан НҰҒМАНБЕКОВА, журналист СЕМЕЙ