"Авангард" капитаны: "Барыс" - өте жылдам ойнайтын команда

Кеше "Барыс"хоккей клубы "Авангард" командасын 3:1 есебімен ұтып, Шығыс конферецниясында 6-орынға көтерілді.  Омск командасының капитаны, танымал ресейлік хоккейші Евгений Медведев Today.kz басылымына сұхбат беріп, "Барыспен" өткен ойын туралы айтып берді. Сұхбат барысында хоккейші ең алдымен "Авангардтың" не себепті жеңіске жете алмағаны туралы айтты: "Мен ең алдымен біздің қақпашымыздың ойынын ерекше атап өткім келеді. Ол бүгін керемет ойнады. Егер ол болмаса, біз "Барыстан" бірінші кезеңде-ақ жеңілер едік. Біз қолымыздан келгенше тырыстық. Бірақ тығыз жұмыс кестесінен матч барысында физикалық дайындығымыз жетіспеген болар. Себебі желтоқсан біз үшін ауыр болды", деді. Журналистің бұл ойындағы шешуші сәтті атауды өтінген сұрағына хоккейші үшінші кезеңге дейін команда жақсы келе жатқанымен, сол сәтте шайба жіберіп алғанын кемшілік ретінде есептейтінін айтты. Евгений Медведев аталған сұхбатта "Барыс" командасы туралы ойын да жеткізді: "Өте жақсы, әрі жылдам команда екені ойындарынан, іс-қиылдарынан-ақ байқалады. "Барысты" бұрынғы жаттықтырушымен ойынын көрген емеспін. Бірақ қазір команда өте жақсы әсер қалдырды", деді. Сонымен қатар ол Жаңа жылда кәсіби хоккейшілердің қандай тілек тілейтіндерін де айтты. Оның айтуынша, кейбіреуі кәсіби тұрғыда, бірі жеке өміріне қатысты тілек тілеуі мүмкін. "Әркімнің мақсаты әртүрлі. Біреуі чемпиондар кубогын, біреулер автокөлік немесе пәтер армандауы мүмкін. Тіпті, барлығын бірден тілейтіндер де бар шығар", деді ол.