Елордада «Астана Балет» театры ашылады

Елордада 10-11 желтоқсанда  «Астана Балет» театрының салтанатты ашылуы өтеді, деп хабарлады Астана қаласы әкімдігінің баспасөз қызметі. Оның құрылысы 2015 жылдың мамырында басталған болатын. Нысанның жалпы ауданы 15 467 м² құрайды. Құрылыс жұмыстарына 400-ге жуық қазақстандық құрылысшы мен маман тартылған. «Бұл - керемет заманауи кешен, мұнда дайындық жасауға, қойылым көрсетуге арналған үлкен залдар, кең және жарық гримдеу бөлмелері, спорт залы және т.б. бар», – дейді театр өкілдері. «Астана Балет» Қазақ ұлттық хореография академиясының жанында орналасқан. Көрермен залының сыйымдылығы – 783 орын, соның ішінде партер – 609 орын, балконның 2-ші ярусы – 104 орын, 3-ші ярусы – 70 орын. Дизайнерлердің ұсынған жобасы бойынша, алтын-қоңыр түсті шымылдық ілініп, орындықтар жауқазын түстес материалмен қапталған, ал еден - қоңыр түсті. Сахнаның ауданы 536 м² құрайды. Сахнаны трансформациялау үшін қозғалмалы және көтеру-түсіру механикасының ең озық технологиялары пайдаланылды.  Сахнада ең күрделі сценографиясы бар қойылымдар қоюға мүмкіндік бар. Театрда сахна ауданымен бірдей жаңа спектакльдерді қоюға ыңғайлы екі дайындық залы қарастырылған.