«Бұл – Рудный қаласындағы бірінші цифрландырылған емхана. Осыған дейін іс қағазсыз жүргізілетін емхана болған жоқ. Мұнда алынған шетелдік жабдықтар да цифрландырылған. Мысалы, цифрлық рентген сырқат адамды түсіргеннен кейін сол сәтте нәтижесін қолына береді. Тіркеу орнында келушілерге қызмет көрсету небәрі 3 минутқа созылады. Мұндай стандарт бұрын кеншілер қаласында болмаған» дейді осы емханаға инвестиция салған «Стомед» компаниясының президенті Владимир Клименко.
Емхананың ашылу салтанатына облыс әкімі Архимед Мұхамбетов қатысып, рудныйлықтарды мерекемен және қалаға жаңа әлеуметтік нысанның қосылуымен құттықтады.
«Бұл жаңа, заманауи емхана 15 мың қалалыққа қызмет көрсетеді. Ол өзінің толық қуатында жұмыс істегенде тағы да 5 мың адам қосымша бекітілетін болады. Емхана мемлекет пен жеке меншіктің ынтымағы арқасында пайда болды. «Стомед» компаниясы инвестиция салды, бюджеттен 19,9 миллион теңге бөлініп, емхананың инженерлік желісі жасалды, субсидия бөлінеді» деді Архимед Бегежанұлы.
Емхана 26 адамға жұмыс беріп отыр. Медицина мамандары да жеткілікті. Күніне 200 адамды қабылдай алады.
Нәзира Жәрімбет,
«Егемен Қазақстан»
Қостанай
