Ауыл адамдары осы малдың сүмесімен күн көріп отыр. Күні ертең ұлымды үйлендіріп, қызымды ұзатсам, перзенттерімді қатарынан қалдырмай оқытсам осы малым қажетіме жарайды деп үміттенеді. Ал бар күнкөрісі сол мал болып отырған ел қазынасын айдың-күннің аманында түре қуып, ізім-қайым жоғалтып жіберу жаулық емей немене? Көкшетау қаласының тап іргесіндегі Кенесары, Баянбай және Жамантұз ауылдарының тәмам жұрты жүген ұстап қалды. Жоғалған жылқымен бірге жылқышының да көзден таса болуы көп күдікке себеп болып тұр. Өйткені жұрт жылқысын сеніп тапсырған жылқышы бір түннің ішінде белгісіз жаққа қопарыла көшіп кеткен. Ұрлықтың ізін індетіп таратып айтатұғын болсақ, қыруар мал бір күннің ішінде жоғалмаған. Аңғал жұрт жылқысының үйірде жоқ екендігін тіпті байқамай да қалыпты. Жылқышы бір үйір жылқыны айдап әкеліп, тізім бойынша иелеріне таратып бергеннен кейін малсақ қауым табында 200 бас жылқының жетпейтінін бір-ақ білген.
– Жылқының қолды болуына байланысты қылмыстық іс қозғалды, – дейді облыстық полиция департаменті баспасөз қызметінің маманы Әсем Әбдірахманова, – қазір Бурабай ауданының бірнеше тұрғыны күдікке ілініп отыр.
Бір қызығы, жылқышының жалы да жығылған жоқ. Қамауға алу жөнінде санкция болмаған. Осы арасын ашынған жұрт түсінбей, аңтарылып отыр. Жайлаған жерінен су шыққандай бір түнде көшіп кеткен жылқышы көрші ауылда тұратын көрінеді. Бәрі белгілі болғанымен, қашағанға құрық түспеу себебі беймәлім.
Байқал БАЙӘДІЛ,
«Егемен Қазақстан»
Ақмола облысы
