• 19 Наурыз, 2010

“МЕМЛЕКЕТТІК ТІЛ – ЕЛ БІРЛІГІНІҢ КЕПІЛІ”

612 рет

көрсетілді

1 мин

оқу үшін

Egemen Qazaqstan

Осындай атпен Мәжілісте ғылыми-практикалық конференция өтеді “Мемлекеттік тіл – ел бірлігінің кепілі”. Парламент Мәжілісінің ұйымдастыруымен аталған ғылыми-практикалық конференция үстіміздегі жылдың 19 наурызы күні өтеді. “Бір тілде сөйлеу – бірлік бастауы” деп аталатын негізгі баяндаманы Парламент Мәжілісінің Төрағасы, “Нұр Отан” халықтық-демократиялық партиясы фракциясының жетекшісі Орал Мұхамеджанов жасайды деп күтілуде. Сонымен қатар, Мәдениет министрі Мұхтар Құл-Мұхаммед “Қазақ тілінің қолданыс аясын кеңейту – маңызды мемлекеттік іс”, ал Білім және ғылым министрі Жансейіт Түймебаев “Қазақстан Республикасының ұлттық білім беру жүйесінде мемлекеттік тілді дамытудың жайы”, Парламент Мәжілісінің депутаты Валерий Вишниченко “Мемлекеттік тілді дамыту – Қазақстан халқы Ассамблеясы жұмысының негізгі бағыттарының бірі” деген тақырыптарды баяндайды. Бас прокурордың орынбасары Мұхтар Жөргенбаев “Қазақстан Республикасындағы тіл туралы” Заңның орындалуын бақылаудың нәтижелері және бақылауды жетілдіру жолдары” жайында қосымша баяндама жасайды. Жиналыстың шеңберінде сенатор Ғарифолла Есім, Мәжіліс депутаты Елена Тарасенко, Халықаралық “Қазақ тілі” қоғамының президенті Өмірзақ Айтбаев, Павлодар облысының әкімі Бақытжан Сағынтаев және басқалар аталған мәселе бойынша ой қозғайды. Мәжіліс депутаттары Зағипа Балиева, Камал Бұрханов, Алдан Смайыл, Бекболат Тілеухан форум барысында көтерілген мәселелерді секциялар бойынша талқылауға модераторлық етеді. Парламентте бірінші рет өткізіліп отырған бұл конференцияны Орал Мұхамеджанов қорытындылайды деп көзделіп отыр.