Кездесу барысында депутаттар Парламентте атқарылған жұмыстар мен қабылданған заңдар жөнінде ауыл тұрғындарын хабардар етіп, Президент Қасым-Жомарт Тоқаевтың 2019 жылдың 2 қыркүйегінде халыққа арнаған Жолдауы жайлы айтты.
Депутаттар Жолдауда айтылған мәселелердің жүзеге асуы туралы да баяндады. Әлеуметтік мәселелер, көпбалалы отбасыларға берілетін жәрдемақы, міндетті әлеуметтік медициналық сақтандыру, атаулы әлеуметтік көмек жүйесіне енгізілген өзгерістер, орта және шағын кәсіпкерлікті дамыту, ауылшаруашылығы саласы бойынша заңға енгізілген толықтырулар жөнінде түсіндірме жасады. Сонымен қатар «Педагог мәртебесі туралы» заңға ерекше тоқталды.
Жиында ауыл тұрғындары өздерін толғандырған өзекті мәселелер жөнінде ұсыныс-пікірлерін білдіріп, сауалдарына тиісті жауап алды.
Сенат депутаттары ауданға жасаған сапарында «Ақлақ» су тоспасы мен «Көкарал» бөгетінің жағдайымен де танысты.
