«Біз – Абай жолындамыз!» атты шараны Л.Н. Гумилев атындағы Еуразия ұлттық университетінің ректоры, ҰҒА академигі Ерлан Сыдықов кіріспе сөз сөйлеп ашты. ҰҒА академигі Ғарифолла Есім, Журналистика мәселелерін зерттеу институтының директоры, көрнекті ғалым Намазалы Омашұлы, «Заманауи зерттеулер» ғылыми-зерттеу институтының директоры, PhD Мұхит Сыдықназаров, Саясаттану кафедрасының меңгерушісі, Президенттік жастар кадр резервінің мүшесі, Абай мұрасын халықаралық деңгейде насихаттау жобасының жетекшісі Индира Рыстина, Телерадио және қоғаммен байланыс кафедрасының меңгерушісі, айтыскер-ақын, филология ғылымдарының кандидаты Серікзат Дүйсенғазы, Жаратылыстану ғылымдары факультетінің 3-курс студенті, «Qamqor» еріктілер қозғалысының мүшесі Диана Сайлаубаева «Ұлттық болмыстың үлгісі», «Жаңа қоғамның жанашыры», «Мемлекет ісінің мүддесі», «Әлемдік мәдениеттің тұлғасы», «Торқалы тойдың тағылымы» тақырыбында ой қозғады.
Сондай-ақ студенттер шара барысында Абай, Шәкәрім, Әлихан бейнесін сомдап, университет ректоры Ерлан Сыдықов «Отырар» кітапханасына академик Серік Қирабаев тапсырған «Абай жолы» эпопеясының алғашқы тарауынан үзінді оқып, эстафетаны Әл-Фараби атындағы Қазақ ұлттық университетінің ректоры Ғалымқайыр Мұтанов пен әлемді аузына қаратқан әнші Димаш Құдайбергеновке, Спорт және денешынықтыру комитетінің төрағасы, Олимпиада чемпионы Серік Сәпиевке тапсырды.
Іс-шара соңында «Кәусар» мәдени-танымдық бірлестігінің жетекшісі, ҚР еңбек сіңірген әртісі, профессор Кенжеғали Мыржықбай Абайдың «Желсіз түнде жарық ай» әнін шырқап, игі шараға жиналғандар естелік суретке түсіп тарқасты.
