Айтулы жарыста Нұр-Сұлтаннан келген балуандардың мерейі үстем болды. Олар үш салмақ дәрежесі бойынша өткен сайыстарда топ жарып, өздерінің бабында екендерін байқатты. Атап айтсақ, Ілияс Аманжолов (65 кило), Санжар Досжанов (70 кило) және Бекзат Үркімбай (92 кило) сынды сайыпқырандарға тең келер ешкім табылмады. Өзге салмақтарда тараздық Рахат Қалжан (57 кило) мен Юнус Гафуров (97 кило), шымкенттік Асыл Айтақын (61 кило) мен Мақсат Сатыбалды (86 кило), ақтөбелік Әкежан Әбдіхамит (74 кило) пен Бейбарыс Нұрылла (79 кило) бас жүлдені олжалды. Алыптардың айқасы Бақдәулет Өсербайдың жеңісімен аяқталды. Түркістаннан келген нар тұлғалы жігіт финалда Маңғыстау облысының өкілі Әлібек Сәрсенғалиевке сан соқтырды.
Қазақстан құрама командасы бапкерлерінің айтуынша, осы жарыста жеңімпаз атанған балуандар үстіміздегі жылы өтуге тиіс әлем біріншілігіне (U-23) қатысады.
