Үздіктер қатарында Қазақстан құрамасының ойыншысы Дуглас Жуниор да бар. Сондай-ақ Дугластан бөлек, бұл тізімде Украина құрамасының қақпашысы – Кирилл Ципун, чемпионаттың үздік ойыншысы португалиялық Зики, испаниялық Серхио Лосано және Ресей құрамасының капитаны Сергей Абрамов бар.
Қарт құрлық біріншілігінде нәтижелі пас беру бойынша бірінші орын иеленген қазақстандық Дуглас Жуниор қатарынан үшінші Еуросына (2016, 2018, 2022) қатысып, үшінші мәрте чемпионаттың шартты құраманың тізіміне еніп отыр. Ал ресейлік Сергей Абрамов үздіктер тізіміне екінші рет қосылды. Ол алғаш рет 2016 жылғы Еуроның үздік бестігінен көрінген еді.
Айта кетейік, футзалдан Қазақстан құрамасы биылғы Еуропа чемпионатының ширек финалында Украинадан жеңіліп, жарысты аяқтады. Ал Украина футзалшылары қола жүлде үшін өткен ойында Испания құрамасынан жеңіліп қалды. Финалда Ресейді 4:2 есебімен ұтқан Португалия қатарынан екінші рет Еуропаның теңдессіз құрамасы атанды.
