Ол бұл техниканы жасауға алты ай уақыт жұмсаған. Жүк тасуға, қора тазалауға, тағы басқа жұмыстарға өте қолайлы шағын техника мал шаруашылығымен айналысатындарға таптырмас құрал болғалы тұр.
Техникаға әуес Абзал Жасұзақ мектепті бітірген соң аудан орталығы Абай ауылындағы №13 кәсіптік колледжінде білім алған. Бұған дейін де 33 жастағы әуесқой маман мал шаруашылығына ыңғайлы бірнеше құрылғы жасап, оларды кәдеге жарата білген. Жақында жасап шыққан бұл техникасын шебер «SherAz» маркасымен таңбалапты, онысы «Шебер Абзал» дегенді білдіреді екен. Мал шаруашылығымен айналысатын өнертапқыш ауыл тұрғындарына пайдасы мол техникалар шығару бағытында ізденіс аясын кеңейте түсуді мақсат етіп отыр.
