ОРТАҚ ІСТЕГІ ОРТАҚ ҰСТАНЫМ КӨРІНІСІ

ЕҚЫҰ-ның Іс басындағы төр­ағасы, еліміздің Мемлекет­тік хат­шысы – Сыртқы істер министрі Қанат Саудабаев Ауғанстан мен Тәжікстанға жасаған жұмыс сапарын Эмомали Рахмонмен кездесумен қорытындылады. Тәжік Президентімен жарты сағатқа жоспарланған кездесу екі сағатқа жуық уақытқа созылды. Кездесу барысында Тәжікстан мен ЕҚЫҰ арасындағы ынты­мақ­тастық, аталған Ұйымның осы ел­дегі офисінің жұмысы әңгіме өзе­гіне айналды. Осы ретте ЕҚЫҰ-ның Тәжікстандағы офисі аймақ­тағы ең бір үлкені саналатынын айта кеткен жөн. Мұнда 200-ге тар­та қызметкер жұмыс істесе, соның 156-сы тәжік азаматы болып табылады. Сондай-ақ бұл елде өт­кен жылдан бастап Ұйымның ше­карашыларды даярлайтын колледжі жұмыс істей бастапты. Онда ай­мақтағы елдердің шекара қызметі мамандарын оқыту жүргізілуде. Үстіміздегі жылы аталған оқу ор­нында ауғандық шекара қызмет­кер­лерін оқыту қолға алынатыны белгілі болды. Сондай-ақ ай­мақтағы проб­ле­малар, нақты айт­қанда, Ауғанстан мен Орталық Азия­дағы жағдайлар барысы тал­қыға салынды. Тәжік­стан Прези­денті орын алған оқи­ғаларды терең саралау осындағы ЕҚЫҰ өкілді­гі­нің жұмысына өте пайдалы бола­тынымен бөлісті. Со­нымен бірге, Э.Рахмон Ұйымның Сам­митін өт­кізу­ді қолдап, форум­ның басты та­қырыптарының бірі Ауғанстандағы жағдайды тұрақ­тан­дыруға бағыт­талуы қажеттігін айтты. Елімізге ерекше ықылас таны­тып келе жатқан Тәжікстан Пре­зи­денті Эмомали Рах­мон Қазақстан басшысы Нұр­сұл­тан Назарбаевтың Орталық Азиядағы көпжылдық ин­те­гра­циялық жігерін, Тәжікстан­дағы дағдарыс жағдайы орын алған шақ­та­ғы еңбегін баға­лай­тынын білдірді. Тәжік басшы­сы­ның айтуынша, Н.Назарбаев терең саясаткер, ондай саясаткер пост­ке­ңестік кеңістікте жоқ. Кез келген мә­селені түпкілікті сара­лап, проб­ле­маны талқылауда және оны ше­шуде табандылық таныта алады. Нұрсұлтан Назарбаев тек қазақ­тарға, қазақстандықтарға ғана емес, сондай-ақ Орталық Азия мен посткеңестік аймаққа да керек”, – деді Э.Рахмон ағынан жарылып. ЕҚЫҰ-ның Іс басындағы төр­ағасы Қазақстанның Ұйымға  төр­ағалығы аймақ үшін құнды болып табылатынын ерекше атады. Ең ал­дымен, оның жұмысы Ауғанстаннан туындайтын экстремизммен және терроризммен күреспен байла­ныс­ты. Олай болса, үстіміздегі жылы терроризммен күрес жөніндегі конференция болатыны да айтып өтілді. Конференцияның басты мақ­саты Ауғанстан мен оның ай­наласындағы, яғни аймақтағы проблемаларды талқыға салу бол­мақ. Сонымен қатар, Арал мәсе­лесінің де назардан тыс қалмай­ты­ны белгілі болып отыр. Қ.Сауда­баев ЕҚЫҰ-ға мүше елдердің Аралды оңалдыру мақсатында нақ­ты материалдық үлес қосу үшін до­норлық конференция өткізілеті­ні­нен де хабардар етті. Қорыта келгенде, Тәжікстан Президентімен болған кездесу нәтижелілігімен ерекшеленді. Мұндай кездесулердің ЕҚЫҰ-ның аймақтағы интеграциялық үдеріс­терді тереңдетуге өзіндік үлес қоса­тынына септесетіні күмәнсіз. Со­нымен қатар, еліміздің білім беру бағдарламаларын күшейтіп, кадр­ларды даярлау арқылы Орталық Азия мен Ауғанстандағы жағдайды тұрақтандыруға күш салған игі мақсатын тағы бір жағынан ашып көрсетті. Асқар ТҰРАПБАЙҰЛЫ.