«Русалка» операсы Алматы театрының репертуарында болмағанымен, Лондонға сапарлап барған кезінде әншінің дауысына лайықталып алдымен музыкасы жазылған болатын. Әншінің арманы болған кейіпкерді театр сахнасында ойнаудың әзірге мүмкіндігі жоқ, алайда чех композиторы Антонин Дворжактың «Русалка» операсы бойынша түсірілген музыкалық фильм арқылы З.Алтынбаева көптен бері көкейінде жүрген идеясын жүзеге асырып отыр. Операның дирижері Эндрю Скит, бейнефильмінің режиссері – Ғалым Асылов, бас операторы – Юрий Левандовский. Ария Корольдіктің филармония оркестрімен (Royal Philharmonic Orchestra) бірігіп жазылған.
Расында да, жеті минуттық картинаны тамашалаған көрермен ғажайып музыканың әуені мен ертегі кейіпкері образындағы Заринаның сыңғырлаған сопрано дауысына тербеле отырып, алтын күздің алқоңыр жапырақтарының сыбдырынан, жарыса келіп жағалауға соғылған теңіз толқынының шуылынан эстетикалық ләззат алады. Бейнефильм өткен жылдың күзінде Қапшағайда түсірілген. «Бүгінгі өміріміздің күрделі болып кеткені сонша, адамдарға сиқырлы, әдемі, таңғажайып әлем жетіспейді. Сондықтан мен ертегі желісіне сүйене отырып, Дворжактың «Русалка» операсын, классикалық музыканың әлемдік шедеврін қайта жаңғыртуды жөн деп шештім», дейді Зарина Алтынбаева. Қасіретпен аяқталатын Андерсеннің әйгілі ертегісі мен Пушкин драмасының оқиғасымен салыстырғанда, музыкалық фильмді түсірген шығармашылық топ бұл «Русалканың» соңын бақытты тағдырмен түйіндеуді құп көрген. Себебі белгілі – көрермен қуаныш сезінсін. Келешекке үміті болсын. Өмір бәрібір сұлу, көркем.
АЛМАТЫ
