• 04 Маусым, 2010

Президент поштасынан

366 рет

көрсетілді

2 мин

оқу үшін

Egemen Qazaqstan

ТАРИХИ ЕРЛІК ЖАЛҒАСА БЕРСІН

Мемлекет басшысының атына “Болашақ мақсатындағы зерде” халықаралық форумына қатысушылардан ұжымдық хат келіп түсті, деп хабарлады Қазақстан Республикасы Президентінің баспасөз қызметі. Араларында Ресейдің, Беларусь Республикасының, Тәжікстанның, Қырғызстанның, Израильдің, АҚШ-тың, Франция мен Швейцарияның азаматтары бар авторлар Қазақстан халқы Ассамблеясының шақыруы бойынша өздерінің Қазақстанға келіп, “Болашақ мақсатындағы зерде” жобасының шараларына қатысып, қазақстандықтармен пікірлесе, “АЛЖИР” мемориалдық мұражайында бола алғаны үшін ризашылықтарын білдіреді. Халықаралық форумға қатысушылар репрессиялардың бейкүнә құрбандарының жарқын бейнесін сақтауға көңіл бөліп отырғаны үшін тікелей Нұрсұлтан Әбішұлы Назарбаевқа алғыс айтады. “Біз үшін қасиетті орындарға тағзым етуге Сіздің тамаша еліңізге келгенде Сіз бізбен тікелей кездесуді қажет деп тауып, зор көңіл және адами қатыстылық танытады деп ойлай қойған жоқ едік. Сізбен кездесуде біз қазақ халқының ізгі жанының бүкіл кеңістігі мен жылылығын шын жүректен сезіндік және сол кезде Қазақстанда болған лагерлер арқылы өткенде біздің ата-аналарымыз неліктен тірі қалғанын, олардың ұрпақтары бізге де ыстық әрі етене болған Сіздің еліңізді неліктен жылылықпен еске алатынын түсінгендей болдық. Қорқынышты жылдар мен тоталитарлық террор құрбандары туралы зердені сақтау үшін Сіз жасап отырған нәрсе – бұл тарихи ерлік. Біз лагерлердің орнында мемориалдық кешендер, ескерткіштер тұрғызылғанын, Сіздің бастамаңыз бойынша міне он жылдан астам уақыт бойы 31 мамыр Қазақстанда Саяси қуғын-сүргін құрбандарын еске алу күні ретінде аталып отырғанын көрдік. Бұл бұрынғының қасіреті қайталанбауы үшін тарихқа қалай қарау керектігі тұрғысынан баршаға өнеге, бұл рухани бастауды сақтау, бұл – Тағзым тағылымы. Ең бастысы – бұл репрессиялардан өзі де сұмдық зардап шексе де, сол қатал уақытта зорлық көрген барлық халықтарды жадында мұқият сақтап келе жатқан қазақ халқының жоғары адамгершілік сезімінің өнегесі. Қазақ халқына рахмет айтып, тағзым етеміз! Біз Сіздің жеріңізден бейбітшілік пен келісімді көрдік. Соның арқасында Қазақстан миллиондаған адамдар үшін тозақ болған жер аудару мен лагерлер орнынан өркендеген елге айналды. Бұл Тәуелсіз Қазақстан құрылған сәттен бастап Сіз жүргізіп отырған мемлекеттік саясаттың нәтижесі. Осындай Президенті бар халық бақытты! Сізге мықты денсаулық және ұзақ ғұмыр тілейміз!” – делінген хатта.