Ветеринарлық ұйымдардың жұмысын талапқа сай жүргізу үшін жергілікті билік қолдан келгенше қолдау көрсетіп отыр. Өңір басшысы Ербол Қарашөкеевтің айтуынша, бұл жұмыстар үздіксіз жүргізілмек. Мәселен, таяуда ғана сала мамандарына жергілікті бюджет есебінен арнайы жабдықталған он бірдей «УАЗ» автокөлігі табысталды.
Өңір басшысы ветеринария ұйымдарының жұмысын жетілдіруге айрықша назар аударып отырғаны белгілі. Қазіргі кезде облыстағы мекемелерді орталықтандыру жұмыстары мықтап қолға алынған. Бұл жұмыс толығымен аяқталған кезде сала мамандарының әлеуметтік жағдайы арта түседі. Облыс әкімінің айтуынша, еңбегіне адал қызметкерлердің жалақысы көбеймек.
«Президентіміз Қасым-Жомарт Тоқаев 2021 жылы Қазақстан халқына арнаған Жолдауында ветеринария саласын реформалауға айрықша ден қойғаны мәлім. Орталық пен өңірлердің нақты міндеттерін айқындап, саланы толықтай цифрландыру, маман даярлау, жалақыны арттыру секілді маңызды міндеттерді де жүктеді.
Қазіргі кезде өңірімізде Президент тапсырмасын іске асыру бойынша нақты жұмыстар атқарылып жатқаны даусыз. Облыстағы ветеринарлық ұйымдарды орталықтандыру жұмысы жолға қойыла бастады. Енді аудандардағы ветеринарлық стансалар өздеріне жүктелген міндеттерді ғана жүзеге асырады. Ал қаржылық-шаруашылық мәселесімен облыстық деңгейде құрылатын кәсіпорын айналысады. Үнемделген қаражат есебінен елді мекендердегі мал дәрігерлерінің жалақысын екі есеге дейін арттыруға мүмкіндік тумақ», деді өңір басшысы сала мамандарына су жаңа автокөліктерді табыстау рәсімінде.
Өңір басшысы алдағы уақытта ауылдардағы ветеринарлық қызмет көрсететін мал дәрігерлерінің жағдайын бақылауға алмаққа бел буып отыр. Сондай-ақ ол ветеринарлық стансалардың материалдық-техникалық базасын нығайтуға айрықша көңіл бөлмек. Әсіресе ветеринарлық пункттерді уақыт талабына сай ғимараттармен, емдеу алаңдарымен қамтамасыз ету жұмыстарына басымдық беріледі.
Тараз
