Үкімет • 12 Сәуір, 2024

Арқалықта тасқыннан зардап шеккендердің үй алуына 405 млн теңге бөлінді

72 рет
көрсетілді
1 мин
оқу үшін

Үкімет қаулысымен тасқын салдарынан зардап шеккен Қостанай облысына қарасты Арқалық қаласы тұрғындарын баспанамен қамтамасыз ету үшін 2024 жылға арналған республикалық бюджетте көзделген Үкіметтің төтенше резервінен 405 млн теңге бөлінді. Қаржыландыру Өнеркәсіп және құрылыс министрлігі арқылы комиссияның бағалауына сәйкес Арқалық қаласында үйлері қалпына келтіруге келмейтін отбасыларға тұрғын үй сатып алу үшін нысаналы трансферттер түрінде Қостанай облысының әкімдігіне жіберілді, деп хабарлайды Egemen.kz Үкіметтің баспасөз қызметіне сілтеме жасап.

Арқалықта тасқыннан зардап шеккендердің үй алуына 405 млн теңге бөлінді

Фото: primeminister.kz

Аталған облыстағы су тасқыны жағдайы республикалық штабтың бақылауында тұр. Бүгінде үлкен судың қарқыны бәсеңдеп, қауіптің беті қайта бастады. Қалалық және аудандық әкімдіктер табиғи сипаттағы ТЖ салдарынан мүлкі бүлінген азаматтардан материалдық шығынды өтеу туралы өтініштерді тіркеді. Бағалау комиссиясы жұмысының қорытындысы бойынша шешім қабылданды. Сонымен бірге Арқалық қаласында және басқа да елді мекендерде үйлерді тексеру жұмыстары жалғастырылып жатыр.

ТЖ режимі жарияланған басқа облыстарда да зардап шеккен нысандарды техникалық тексеру, бағалау, тізбесін жасау бойынша жұмыстар жүргізіліп жатыр. Қауіптің азаюына қарай зардап шеккен азаматтардың тұрғын үй мәселелері шешілетін болады.