Өндіріс • 22 Мамыр, 2024

Ас тұзын өндіретін «Алтын Орда»

96 рет
көрсетілді
4 мин
оқу үшін

Азық-түлік саласында айрықша рөлі бар өнімнің бірі – тұз. Жалғыз бұл салада ғана емес, кейбір өндірістік жұмыстарға да пайдасы зор элементтің адам өмірінде маңызы ерекше. Біздің елден шығатын осы өнім ішкі нарықты қамтамасыз етіп қана қоймайды, ТМД елдеріне де экспортталады.

Ас тұзын өндіретін «Алтын Орда»

Арал теңізінің табанынан қазылатын тұздың дәмі көп мемлекеттің ас мәзірінде жүр. Ал Қызылорда қаласында орналасқан «Алтын Орда» ЖШС – йодталған ас тұзын өндіруде көшбасшы компаниялардың бірі. Аталған серіктестік 1997 жылдан бері жұмыс істейді.

Бұған дейін көптеген бизнес жобаны іске асырып келген серіктестік 2016 жылдан бастап барлық талап пен сапа стандарттарына сәйкес «Ассоль» және «Сафия» брендтерімен ас тұзын өндіреді. Кәсіпорында екі зауыт бар. Алғашқысы 2016 жылы іске қосылып, сағатына 3 тонна тұз шығара бастады. Ал осыдан екі жыл бұрын сағатына 10 тонна өнім шығаратын заманауи цех орнатылып, екінші зауыт жұмысын бастады.

шг

«Бастапқыда өнім көлемі аз болды. Бірақ, ең бастысы, сапаға ғана жұмыс істедік. Бұл үрдіс әлі де жоғалған жоқ. Қанша мың тонна ас тұзын шығарсақ та, алдымен тұтынушылардың қауіпсіздігі мен денсаулығына кепілдік береміз. Яғни шикізат пен өзге материалдарды 100 пайыз қадағалап отырамыз. Соның арқасында 2021 жылы компания Президенттің өнімдер мен қызметтер сапасы саласындағы «Алтын сапа» сыйлығының жеңім­пазы болды. Ал былтыр жыл соңын­­да республикадағы «Ұлы Дала Елі» бірыңғай брендін пайдалану құқығын беруге арналған конкурс­тың жеңімпазы атандық», дейді кәсіпорын директоры Нариман Абжанов.

Оның айтуынша, былтыр Мемлекет басшысы Қасым-Жомарт Тоқаев Сыр еліне жұмыс са­пары кезінде зауытта болып, кәсіп­орын­ның әлеуетіне жоғары баға­ беріпті.

Компанияда 150-ден астам адам жұмыс істейді. Серіктестіктің мақ­­саты да сол, жергілікті тұр­ғын­дарды жұмыспен қамтуға ба­сым­дық берген. Орташа айлық 170 мың теңге көлемінде. Сондай-ақ кәсіпорын өңірдегі көптеген қайырымдылық шарасында да белсенді. Серіктес компаниялармен бірігіп, өлкенің өркендеуіне, дамуына өз үлесін қосып келеді.

«Кәсіпорын ішкі нарықта, яғни барлық өңірді қамтып отыр. Сондай-ақ өнім сырт мемлекеттерге де тасымалданады. Бұл – өңірдің әлеуметтік-экономикалық жағдайына оң әсер етіп жатыр. Қазір біздегі «Ассоль» және «Са­фия» сауда белгісімен да­йындалатын ас тұзы Ресей, Беларусь, Грузия, Қырғызстан, Моң­­­ғо­лия­ мемлекеттеріне және Балтық елдеріне жібе­рі­леді. Экспортталатын мемлекет қата­­­ры­на тағы бір ел қосылды. Ол – Қытай Халық Республикасы. Мамыр айының басында өнімді бірінші рет сонда жібердік. Айта кету керек, Қытай елі ең бірінші өнім сапасына, оның табиғилығына аса қатты назар аударады. Осындай талаптардан өткен біздің өнімді алдағы уақытта тағы да көптеген елге жіберу туралы жоспарымыз бар», дейді кәсіпорын басшысы.

Компания ас тұзынан бөлек, техникалық тұз да өндіреді. Тапсырыс аясында жылына 60 мың тоннаға дейін дайындайды. Бұл өнім Қазақстаннан бөлек көбіне-көп Ресейге жөнелтіледі. Қысы қатты, қар көп жауатын елдің жол тазалау жұмыстарына пайдаланылып, көктайғақтың алдын алса керек. Сондай-ақ әртүрлі өндіріс орны мен мұнай компания­сынан да тапсырыс жиі түсіп тұр.

Айта кетейік, аталған кә­сіпорын­ның нағыз шикізаты өңір­ден қазылып алынады. Облыс аумағы мен Ұлытау облысы шекарасына жақын, Қызылорда қаласынан 180 шақырым жердегі «Арыс» кен орнынан зауытқа арнайы техникамен тасылады.

Алдағы жоспарларымен бөліс­кен Нариман Абжанов ендігі мақсат – үшінші тұз өндіру зауытын іске қосу екенін айтып отыр. Осы арқылы ас тұзын өндіру межесін жылына 100 мың тон­наға дейін жеткізбек. Оған кәсіп­орын­ның ішкі мүмкіндігі де жеткілікті екен.