Демеушілер «Жас дарынға» сыйлық жасады

Облыс орталығындағы қазақ тілінде білім беретін «Жас дарын» аталатын  мектеп оқу-білімге талпынысы ерекше оқушылар үшін 1999 жылы  ашылды. Бұл күндері мектепте 340 оқушы білім алуда. Ал мектеп қаладағы бұрынғыдан келе жатқан тарихи ғимараттардың бірінде орналасқан. Мектепте 14 оқу кабинеті бар. Химия, физика, биология кабинеттері қазіргі заман талабына сай жабдықталған. Жалпы, оқыту үдерісі  жаратылыстану-математикалық және қоғамдық-гуманитарлық бағытта жүргізіледі.  Қоғамдық-гуманитарлық бағыттағы сыныптарда   ағылшын тілі мен қазақ тілі тереңдетіліп оқытылады. Көптілділікті дамыту бағыты 5-сыныптан басталады. Елжандылық, отаншылдық, елді сүю, патриоттық тәрбие сабақтары жүргізіледі. Елбасы Жолдауында білім беру сапасын арттыруды дүниежүзілік стандарт деңгейіне жеткізу басты мақсат екені айтылды. Қазір біздің еліміздегі көптеген мектептерге халықаралық байқауларға қатыса аламыз. Осы арқылы оқушылардың жетістіктері мен білімдері көрінетіні сөзсіз. Мектептің білім беру, тәрбиелік кеңістігін ғылыми жобалар, сайыстар, интеллектуалдық марафон, көркем шығармашылық бағытындағы жобалар құрайды. Үздік оқушылары халықаралық, республикалық байқауларға қатысуда. Ғылыми жобалар жазып, мектеп қабырғасында жүріп, ізденіспен, шығармашылықпен жұмыс жасайды. Мохамед Әл Әмір, Еркегүл Асайын, Тұрсын Махмұд, Даниял Хабиболла, Аружан Тұрғанова, Дария Шеген, Күләш Қоңырова, Әлия Ақбаева және басқа ұл-қыздарымыз мектептің мақтаныштары. Білімді, көп тіл білетін  болашақтың мамандары ержетіп келеді деген сөз. – 2009 жылы мектеп ғимаратынан бөлек спорт зал салынды. Оқушылар денешынықтыру сабағына бару үшін екі арада жүрді. Содан бері облыс әкімдігіне  оқу ғимараты мен спорт залдың арасын қосатын өтпелі аралық  галереяның салынуын сұрап бірнеше рет өтініш жаздық, – дейді мектеп директоры  Сәуле Хасанова. Сөйтіп, арада 6 жыл өткенде ұстаздар, ата-аналар, оқушылар өтініші орындалды. Облыс әкімдігімен  ERG S.a.r.l. өзара ынтымақтастық жөніндегі меморан­думының арқасында биыл «Жас дарын» мектебінің аралық галереясын салу үшін демеушілік жасалып, қаржы бөлінді. – Біз демеушілерге, облыс әкімдігіне алғыс білдіреміз.  Мектеп пен  спорт залдың арасын қосатын аралық галереямыздан оқушыларымыздың көңілді дауыстарын есту біздер үшін де, ата-аналар үшін де қуаныш, – дейді «Жас дарын» мектебінің ұстаздары. Фарида БЫҚАЙ, «Егемен Қазақстан». ПАВЛОДАР.