Саясат • 26 Маусым, 2024

ОДМ-ның негізгі мақсатына арналған жинақ таныстырылды

67 рет
көрсетілді
3 мин
оқу үшін

Taldau Talks диалог алаңының кезекті отырысы өтті. Онда Орнықты даму мақсаттарының бес негізгі мүддесіне арналған жинақ көпшілікке таныстырылды. Аталған еңбекті Парламент Сенаты жанындағы Сарапшылар клубының мүшелері мен «Талдау мектебі – Школа аналитики» жобасының үшінші кезеңінің түлектері бірлесіп әзірледі, деп хабарлайды Egemen.kz ҚР Парламенті Сенатының баспасөз қызметіне сілтеме жасап.

ОДМ-ның негізгі мақсатына арналған жинақ таныстырылды

Фото:ҚР Парламентінің Сенаты баспасөз қызметі

Мемлекет басшысы «Орнықты даму мақсаттарына қол жеткізу жолындағы прогресті жеделдетудің негізгі өтпелі процестеріне қатысты ауқымды іс-қимылдарды жандандыру» атты Көшбасшылар диалогының бірінші сессиясында сөйлеген сөзінде ұлттық стратегиялар мен бағдарламаларды әзірлеу кезінде орнықты даму қағидаттарының маңызы зор екенін атап өтті. Мемлекет бюджетінің 80 пайызы орнықты даму мақсаттарына сай келеді.

ОДМ-ға қол жеткізу мәселелеріне арналған материалдар жинағы – талдаушылар мен менторлардың «Талдау мектебі – Школа аналитики» жобасының оқыту курсы аясындағы топтық жұмысының қорытындысы. Оның нәтижелері орталық және өңірлік деңгейлерде назарға алынады. Жинақта талқыланған мақсаттар кедейлікті жою, денсаулық сақтау мен білім деңгейін арттыру, су сапасын жақсарту және экономикалық өсу мәселелеріне қатысты.

«Президентіміз Қасым-Жомарт Кемелұлы Тоқаевтың тапсырмасымен Парламент Үкіметпен, азаматтық қоғамдастықпен және сарапшылармен бірге Орнықты даму мақсаттарын іске асыру бағытында жүйелі жұмыс жүргізіп келеді. Біз Орнықты даму саласындағы ұлттық мақсаттар мен міндеттердің іске асырылуына мониторинг жүргізу жөніндегі Парламенттік комиссия аясында Біріккен Ұлттар Ұйымының құрылымдарымен белсенді байланыс орнаттық. Осы тұрғыдан келгенде, Талдау мектебінің тақырыбы аталған бағытпен үндес екенін айта кеткен жөн. Алдағы уақытта жарық көріп отырған жинақ мүдделі мемлекеттік органдарға, талдау орталықтарына және университеттерге жіберіледі», деді Палата Спикері қатысушыларға жобаның идеясын қолдағандары үшін алғыс білдіріп.

Сондай-ақ сарапшылар Президенттің тапсырмасымен құрылған Орнықты даму саласындағы ұлттық мақсаттар мен міндеттердің іске асырылуына мониторинг жүргізу жөніндегі Парламенттік комиссия аясында орнықты дамудың қалған мақсаттары бойынша да жобалар әзірлеу және бірлесіп жұмыс істеу бағытындағы бастамаларды талқылады.

Жинақты таныстыру барысында БҰҰ-ның Қазақстандағы Тұрақты үйлестірушісі Микаэла Фриберг-Стори, экономист Алмас Чукин, медиа-менеджер Эльмар Муртазаев және тағы басқа сарапшылар сөз сөйлеп, өз ұсыныстарын білдірді.

Еске сала кетейік, Taldau Talks диалог алаңының алғашқы отырысы биыл наурыз айында өтті. Ол кезде іс-шараға арнайы шақырылған спикер Орталық Азия тақырыбы бойынша белгілі американдық маман Фредерик Старр сөз сөйлеген еді.