Қолға үйренген қу түлкі

Міне, екінші айға айналып барады, алпыс айлалы қу түлкі таңертеңгілік мезгілде «СевКазЭнерго» АҚ-қа келу дағдысынан бірде-бір жаңылған емес. Мекеме қызметкерлері оны үйлерінен әкелген жылы-жұмсақпен тамақтандырып, әбден қолға үйретіп алған сыңайлы. – Бастапқыда түлкі еке­нін аңғарған жоқпыз. Қаң­ғыбас иттердің бірі шығар деп жорамалдадық. Екі көзі мөлдіреген сүп-сүй­кімді түз тағысы арнайы орынға қойылған тамаққа жақындаудан үркектеп, көпке дейін бойын аулақ салып жүрді. Кейін адамдардың өзіне жамандық ойламайтынын сез­ді білемін, бірте-бірте үйренісе бастады. Жақыннан суретке түсіріп алу мүмкіндігіне де ие болдық, – дейді баспасөз орталығында жұмыс істейтін Игорь Татарченко. Кейбіреулер «шақы­рыл­маған қонақтың» бұл «қыдырысын» мекеменің қалың орманға тақау орналасуымен байланыстырса, екіншілерінің пікірлері қарны ашқаннан кейін елді мекендерді жағалаған болу керек дегенге сяады. Былтыр қытымыр қыстың қысымына шыдай алмаған еліктер мен тиіндер де осында «қыстап» шығыпты. Табиғат қорғау саласының мамандары жыл өткен сайын түлкі секілді түз аңдары­ның көбейіп келе жатқанын жеткізді. Мәселен, Смирнов қорығында 2013 жылы бар-жоғы 36 түлкі болса, былтыр 268-ді құрапты. Өмір ЕСҚАЛИ, «Егемен Қазақстан». Солтүстік Қазақстан облысы. Суретті түсірген Игорь ТАТАРЧЕНКО.