Өңірдің демографиялық өсіміне өз үлесін қосқан, дүниеге үшем әкелген Роза Әріпбаеваны арнайы құттықтап барған облыстық Денсаулық сақтау басқармасының басшысы Асхан Байдуәлиевтің айтуынша, 2024 жылдың бірінші жартыжылдығында 25 045 нәресте дүниеге келген. Ал аталған перинаталдық орталықта жыл сайын шамамен 9,5 мыңға жуық әйел босанады.
«Дені сау ұлт» әр азамат үшін сапалы әрі қолжетімді денсаулық сақтау» ұлттық жобасы аясында перинаталдық орталық жаңа туған нәрестелерге заманауи реанимациялық көмек көрсетеді. Бұл үшін барлық қажетті жабдық бар. Сондай-ақ өңірде алғашқылардың бірі болып медициналық генетика бөлімшесі іске қосылған. Бұрын Шымкент пен Түркістан облысы бөлінбей тұрып, қала тұрғындары да №1 облыстық перинаталдық орталығына келіп генетикалық тест тапсыратын. Содан бері арада 6 жыл өтсе де, облыс тұрғындары генетикалық тесті осында тапсырады. Себебі облыста мұндай генетикалық орталық біреу-ақ. Негізі жоспар бойынша осындай орталықтың облыс бойынша тағы үшеуін ашу керек. Шымкенттің өз перинаталдық орталығы бар, сондықтан қала тұрғындары сонда барып өткізеді. Халық санына байланысты республика бойынша халыққа көмек көрсету сатысында алдыңғы қатарда тұрған №1 облыстық перинаталдық орталық 2022 жылы ең үздік босандыру ұйымы ретінде «Алтын шипагер» медициналық жүлдесіне ие болған. Орталық басшысы Салтанат Жабағиеваның айтуынша, дәрігерлер кураторлық көмек көрсету және білімді мониторингілеу мақсатында облыс аудандарына барып, жұмыс жүргізеді. Яғни білікті дәрігерлер өз жауапкершілігіне перинаталдық орталықтағы жұмысынан бөлек, өздеріне жүктелген аудандардағы перзентханалардың жағдайын да бақылап, ай сайын барып көмек қолын созып отырады.
«Кейде айына 1-2 рет, кейде 10 рет санавиацияға шығуға тура келетін жағдайлар болады. Ол жаққа толық бригада болып барады. Хирургтің көмегі қажет болса, оны да қосып жібереміз. Сосын қажет болса, мамандарымыз сол жерде операция жасайды, босандырады, еміне коррекция жасап көмек көрсетеді. Әйелді стабилизациялық жағдайға келгенінше сол жерде бақылауға аламыз. Яғни кейде дәрігерлеріміз сол аудандардағы перзентханаларда екі-үш тәуліктеп жүріп қалуы ғажап емес», дейді Салтанат Өсетіллақызы.
Сондай-ақ перинаталдық орталықта реанимацияға көп көңіл бөлінеді. Себебі балалардың өлім жағдайына жол берілмеуі керек.
«Салмағы жетпей туған нәрестелер кемінде 2,5 кило салмақ жинамайынша үйіне шығармаймыз. Нәресте өз еркімен еме алатын жағдайда болуға тиіс. Кей шараналардың патологиясы болады. Сондай күрделі жағдайдағыларды балалар ауруханасына ауыстырамыз. Ал балалар ауруханасы салмағы 2,5 килоға жетпеген балаларды қабылдамайды. Яғни туа біткен ақауымен өмір есігін ашқан шарана өсіп, операцияларды көтере алатындай жағдайға жеткенше біздің қамқорлығымызда болады», дейді дәрігерлер.
Президенттің тапсырмасымен елімізде «Аңсаған сәби» әлеуметтік бағдарламасы 2021 жылдан іске асырылып келе жатқаны мәлім. Бұрындары экстракорпоралды ұрықтандыру (ЭКҰ) қызметіне тек Алматы, Астанаға баратын Түркістан облысы мен Шымкент қаласы тұрғындарына бұл қызмет түрі бүгінде қолжетімді. Үшінші мегаполисте бір емес, бірнеше клиника бар. Ал №1 облыстық перинаталдық орталығы әйелдерді толық тексеруден өткізіп, ЭКҰ қызметін жасайтын клиникаларға жолдама беріп отырады. Бұл жердің тиімді тұсы – бала аңсап жүрген әйелдер шығындалмайды. Барлығы мемлекет есебінен төленеді. Яғни әйелдер портал арқылы келіп, тегін ЭКҰ қызметіне жүгіне алады. Орталыққа 2021 жылға дейін жылына 70-ақ квота бөлініп отырған болса, бұл көрсеткіш кейін 666-ға жеткен. 2022 жылы 550 ЭКҰ жасалған. Сол 550 әйелдің 261-і жүкті болған. Бұл жасанды жолмен ұрықтандырудың сәтті шыққан нәтижесінің 48 пайызын құрайды. Ең ғажабы 261 сәтті жүктіліктен 42 егіз және бір үшем анықталған.
Түркістан облысы
