Сурет: ru.freepik.com
Астана тұрғындары Жөкей көліндегі «Темнобор» орманшылығының ерекше қорғалатын табиғи аумағындағы көлге ау салған. Инспекторлар заңсыз әрекетке барған азаматтарды рейд кезінде қолға түсіріп, олардың жалпы салмағы 640,3 кг тартатын 464 балық аулағанын білген. Балықтың 631,6 килосы сазан, 8,7 килосы табан. Бұл оқиға – кейінгі 5 жылда «Бурабай» ұлттық паркінің аумағындағы су айдындарында тіркелген ең ірі браконьерлік факті. Салдарынан табиғатқа келген залал – 9 132 827 теңге. Қазірде құқық бұзушылық бойынша барлық дерек Біржан сал ауданының полиция бөліміне берілген.
Кейінгі жылдары Жөкей көлінен заңсыз балық аулау фактілері жиілеп кетті. Биыл Ұлттық парктің көлдерінде тіркелген сегіз фактінің бесеуі дәл осы суқоймасында орын алды. Құқық бұзушылар қылмыстық жауапкершілікке тартылды. Соңғы фактіге дейін жалпы шығын 2,5 миллион теңгені құраған. Реті келгенде су айдындарын қорғауға, ихтиофаунаны сақтауға «Бурабай» мемлекеттік ұлттық табиғи паркінің дирекциясы көлдердің жағасында Smart National Park Burabay ақылды бейнебақылау жүйелерін орната бастағанын айта кетейік. Мұндай камералар бірінші дәл осы Жөкей көлінің жағалауына орнатыла бастаған. Жыл соңына дейін камералар іске қосылса, көлдегі жағдайды тиімді бақылауға, браконьерлердің әрекетін жедел тоқтатуға мүмкіндік туады.
«Бурабай» ұлттық паркінің директоры Сергей Быковтың айтуынша, бейнебақылау камералары браконьерлерден бөлек, парк аумағында тіркелетін басқа да заңсыздықтарды анықтауға мүмкіндік береді.
«Инспекторлар жыл басынан бері заңсыз балық аулау фактісі бойынша бірнеше браконьердің үстінен түсті. Заңсыз әрекетке барғандар жауапқа тартылды. Енді көлдер аумағында жаңа үлгідегі бейнебақылау технологияларын енгізіп жатырмыз. Бұл қадам браконьерлердің жолын кесіп, ихтиофаунаны сақтауға септеседі. Сонымен қатар жартастарды бүлдіріп, көл аумағына қоқыс тастайтын бұзақыларға да тосқауыл болады деп үміттенеміз», дейді С.Быков.
