
Қазақстан Президенті Путинді елордадағы резиденциясында қабылдау кезінде Қазақстан жаһандық күрделі кезеңде Ресейдің сенімді стратегиялық серіктесі әрі одақтасы екенін, алдағы уақытта да бұл бағыттан айнымайтынын атап өтті.
Мемлекет басшысы екіжақты қарым-қатынастар стратегиялық серіктестіктің берік іргетасы негізінде нығайып келе жатқанын мәлімдеді.
Қауіпсіздік мәселелерін талқыламақ
Ресей Президенті Владимир Путин Орталық Азиядағы одақтасымен қарым-қатынасты нығайтуға бағытталған екі күндік сапармен Қазақстанға барды.
Сондай-ақ бұл сапарда ҰҚШҰ ұйымына мүше Қазақстанмен қауіпсіздік мәселелерін талқыламақ.
Путиннің сапары қарсаңында ресейлік «Известия» газетінде жарияланған мақаласында Қасым-Жомарт Тоқаев Қазақстан мен Ресей көпполярлы әлем, бейбіт диалог, барлық мемлекеттің егемендігін құрметтеу сияқты идеяларды дәріптеп, халықаралық аренада өзара табысты қарым-қатынас жасап отырғанын атап өтті.
Ғарышты бірлесіп зерттейді
Жаңа жаһандық тәртіп жағдайында стратегиялық әріптестікті тереңдету туралы қос ел президенттерінің бірлескен мәлімдемесінде тараптар 70 жылдық мерейтойы келесі жылы кеңінен атап өтілетін «Байқоңыр» ғарыш айлағының тарихи маңызы туралы ортақ ұстанымдарын растады.
«Байқоңыр» ғарыш айлағы – жалпыадамзаттың ортақ игілігі», деді Қасым-Жомарт Тоқаев пен Владимир Путин бірлескен мәлімдемеде. Олар ғарышты бірлесіп зерттеуді одан әрі жалғастыруға уағдаласты.
Одақтастық барлық салада дамып келеді
Қазақстан мен Ресейдің ынтымақтастығы шын мәнінде одақтастық сипатта және барлық салада белсенді түрде дамып келеді. Бұл туралы «Казахстанская правда» газетінде жарияланған Ресей Президенті Владимир Путиннің мақаласында айтылған.
Ресей Президенті Қазақстанға кезекті мемлекеттік сапары қарсаңында жарық көрген мақаласында екі ел арасындағы қарым-қатынастардың қазіргі жағдайы мен болашағы туралы өз көзқарасымен бөлісті. Ол Ресей Қазақстанның ірі экономикалық серіктестерінің бірі екенін атап өтті.
Достықты тереңдетуге дайын
В.Путин Қазақстан газетінде жарияланған мақаласында Қазақстанның мәдени, рухани-адамгершілік құндылықтарына деген ынтасын жоғары бағалап, Астанамен достық және одақтастық қарым-қатынастарды одан әрі дамытуға дайын екенін айтты.
Сәрсенбіде Ресейдің мемлекеттік БАҚ-тары Путиннің ұшағы елордаға қонған сәтінің түсірілімін көрсетті. Путин дамып келе жатқан экономикалық альянсты кеңейтудің де ортақ келісімдері туралы мәселе қозғады.
Бірлескен жобаларды пысықтады
Ресей Президенті Владимир Путин Қазақстан Президенті Қасым-Жомарт Тоқаевтың шақыруымен Астанаға мемлекеттік сапармен келді.
Қазақстан Ресейдің ежелден әскери және экономикалық серіктесі және алпауыт көршімен 7 500 шақырым (4 650 миль) шекараны бөліседі.
Екі ел басшылары келіссөздер барысында сауда-энергетикалық байланыстарды да талқылап, бірқатар бірлескен жобаны егжей-тегжей пысықтады. Сондай-ақ екі ел президенттері бірнеше құжатқа қол қойып, БАҚ өкілдеріне арналған мәлімдеме жасады.