Инновациялық технологияларға қызығушылығы бала жастан оянған Рауан «Python» бағдарламалау тілін өз еркімен үйреніп, тапсырмаларды автоматтандыру, деректерді жинау мен өңдеу үшін скрипттер жазуды, сонымен қатар «SQLite» деректер базасымен жұмыс істеуді еркін меңгерген. Жас талап веб-әзірлемеде де жоғары деңгейде, «HTML», «CSS», «JavaScript» тілдерін біледі, сол арқылы веб-беттерді жасау және баптаумен айналысады. Бұдан басқа, ол рутиналық үдерістерді автоматтандыруға арналған шешімдер әзірлеп, веб-сайттардан деректерді жинау құралдарын қолдануда да біраз тәжірибе жинаған. Математика мен физиканы құлшына оқитын ол, болашақта еліміздің техника, экономика ғылымдарына, IT саласына өз жаңалығымды әкелсем деген арманын жеткізді.
«Жер жүзінде пайда болып жатқан технологиялық жетістіктер көптеген мамандықтың жойылуына әкеліп отыр. Үлкен ұжыммен жабылып жасайтын жұмыстарды бір ғана компьютер атқарады. Технологиясы дамыған елдер – ең бай мемлекеттер. Менің де мақсатым – ел ғылымының дамуына өз үлесімді қосу. IT саласына қызығушылығым мені үнемі дамуға ұмтылдырады, жаңа технологиялардың соңғы жаңалықтарын қалт жібермей қадағалап отырамын. Ұстаздарымның бағыт-бағдары, ата-анамның қолдауы армандарыма жетуіме қанаттандырады. Ол үшін талмай іздену, еңбектену қажет екенін жақсы түсінемін. Оқуымды ойдағыдай аяқтап, Массачусетс технологиялық институтында білім алсам деймін. Олардың технологиядағы озық білімдерін игеріп, үйренгенімді өз елімнің игілігіне, дамуына жұмсасам деген ниетім бар. Себебі бізде технология саласындағы үлкен кеңістік бос тұр, талай жобаларды жүзеге асыруға болады», дейді Рауан Нұрлыбек.
Талабымен танылған кейіпкеріміз «Ақбота», «Русский медвежонок» секілді интеллектуалды байқауларда бірнеше рет жеңімпаз атанған. Жақында Алматы қаласындағы №134 лицейде өткен олимпиадада информатика пәнінен 190 ұпай жинап, І орынға ие болды. Республикалық және халықаралық олимпиадаларға белсенді дайындалып жатқан оқушы 6-сыныптан бастап күрделі тапсырмаларды оңай шешетін ерекше қабілетімен көзге түскен. Ол өзін математик, физик және IT маманы деп санайды.
Шахмат ойнағанда қарсылас шақ келтірмейтін талапкердің логикалық ойлау қабілетінің жоғарылығына ұстаздары да сүйсіне қарайды. «Талаптың оты арындап» тұрған шағында алдына биік мақсат қойып, табысқа талпынған оқушыға толағай жетістік тілегің келеді.
АЛМАТЫ
