Омбылық әріптестері кітапханаға «Омбыдағы пушкиниана» миниатюралық кітабын сыйға тартты. Миниатюрлік басылымдар оқырмандар арасында ерекше қызығушылық тудырады. Сирек кітаптар қорындағы мұндай жинақтар жеке қолға берілмейді. Тек оқырман залында алып қарауға мүмкіндік бар.
Кітап қорының басшысы Бақытжан Бұқашеваның айтуынша, көлемі шағын кітаптардың ішінде көркем әдебиет және салалық туындылар сақталып отыр. Дені қазақ және орыс жазушыларының шығармалары. Ең кішісі Омар Хаямның 50х70 мм өлшемінде шығарылған жинағы екен. Мұнда Пушкин туралы әдебиеттер каталогі да бар.
Сирек кітаптар бөлімінің басшысы Марина Гончарова әрбір кітап өзінше құнды дейді. Халықаралық стандарттарға сәйкес, ұзындығы мен ені 3 дюйм, яғни 76 миллиметрден аспайтын кітаптар миниатюралық басылым болып саналады екен. «Мекемеде сирек кітаптар жинақталған бес зал бар. Онда құнды және сирек кездесетін кітаптар кездеседі. Он тоғызыншы ғасырдың аяғы мен жиырмасыншы ғасырдың басында жарық көрген кітаптар бар. Авторлардың қолтаңбалары сақталған. Одан кейінгілері факсимильді қайта басылып шыққан және миниатюралық кітаптар» дейді маман.
Шағын көлемді кітаптар ХVІІ–ХVІІІ ғасырларда аса танымал болған екен. Олар ел арасында кәдесый ретінде жүріпті. Мазмұны мен құндылығы жағынан кәдімгі кітаптан ешқандай айырмашылығы жоқ. Тек шағын таралыммен шығып отырған.
Павлодар кітапханасындағы миниатюрлік басылымдар қорында Жұбан Молдағалиевтің поэмалары, Мұхтар Әуезовтің «Абай жолы» романынан үзінділер, өзге де танымал авторлардың туындылары бар. Ең бастысы, шағын кітаптар қатары толығып отырады. Ең жаңасы – ақын Виктор Семерьяновтың «Мәшһүр шыңы» поэмасы.
ПАВЛОДАР
