Алты томдық кітап автордың 1993 жылдан бастап үздіксіз жазып келе жатқан күнделіктеріне негізделген. Онда елімізде болып жатқан аса маңызды тарихи оқиғаларға мән бере келіп, қоғамдық өмір туралы көзқарасын кестелейді, әр кезең мен ұрпақтың мінезі мен көңіл күйі, өткен, қазіргі және болашақ туралы толғанады. Яғни жаңа жинақ автордың қағаз бетіне түскен жан сыры десек болады. Мырзатай Жолдасбековтің өзі жазғандай: «Күнделік – сырласың. Онымен сырласуға, сөйлесуге болады. Ол – сенің сыңарың, жан досың. Мен күнделік жазбаған күні бірдеңе жоғалтқандай боламын».
Автордың айтуынша, күнделік небір ойларға да жетелейді. Қолыңа қалам алып, күнделіктің бетін ашсаң, уақыт, заман, адам туралы толғанасың. Кейде оның тұңғиық тереңіне түсесің. Жастарды жерден алып, жерге салып жататындарға таңым бар. Бүгін сен түзелсең, ертең ел түзеледі, деп жазады автор.
Күнделікте кестеленген ел өміріндегі әрбір оқиға тарихи шежіре іспетті. Тұсаукесер барысында айтылғандай, тәуелсіз елдің тасқа басылмаған парақтары ұлттық ерекшелікті сақтауда аса маңызды рөл атқарады.
Алқалы жиында мемлекет және қоғам қайраткерлері, зиялы қауым өкілдері сөз алып, көптомдықтың мән-маңызы жөніндегі ойларын ортаға салды.
