Сурет: gov.kz
Сенаторлар әуелі «Қазақстан алюминийі» АҚ глинозем алу цехының жұмыс үрдісімен танысып, содан соң «Павлодар мұнай-химия зауыты» ЖШС басқару орталығына барды. Павлодар химия-механикалық колледжі мен жоғары түсті металлургия колледжін аралап көрді.
Облыс әкімдігінде «Еңбек адамы – ұлттық экономиканың өсуі мен ұлттың өркендеуінің негізі» тақырыбында өтетін парламенттік тыңдауға дайындыққа, Мемлекет басшысының «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауын іске асыруға арналған Әлеуметтік-мәдени даму және ғылым комитетінің көшпелі отырысы өтті.
Жұмысшы мамандықтар жылы аясында Мемлекет басшысының тапсырмаларын іске асыруға қатысты мәселелерді талқылауға комитет мүшелері Айнұр Арғынбекова, Талғат Жүнісов, Алтынбек Нұхұлы, Әсем Рахметова, Руслан Рүстемов, Амангелді Толамисов, жергілікті атқарушы органдардың басшылары мен кәсіподақтардың өкілдері қатысты. Іс-шараға төрағалық еткен комитет төрағасы Нұртөре Жүсіп негізгі мақсат жұмысшылардың еңбек жағдайларын зерделеу, Павлодар облысында техникалық, орта кәсіптік білім беру жүйесінде мамандар даярлау екенін мәлім етті.
Өңір әкімі Асайын Байханов атап өткендей, облыста кешенді іс-шаралар жоспары түзілген, ол 3 бағытты қамтиды. Ең әуелі колледждерді кезең-кезеңімен жаңғырту көзделіп отыр. Бұған облыстық бюджеттен кәсіптік-техникалық білім беру ұйымдарын жарақтандыруға, жаңғыртуға шамамен 500 млн теңге бағытталады. Әлеуметтік әріптестік аясында ERG, Kazminerals кәсіпорындары 6 колледжге заманауи жабдықтар сатып алуға 500 млн теңге қаражат бөлді. Екінші бағыт – жұмыс істейтін жастар қатарындағы студенттер үшін 100 млн теңгеге жаңа ынталандырушы сыйақылар мен гранттар тағайындау. Соңғысы – жұмысшы мамандықтарының беделін арттыру, кәсіпорын қызметкерлерін ынталандыру.
Аймақта экономикалық белсенді деп саналатын 405 мың адам бар болса, оның 60%-дан астамын жұмысшы мамандықтар өкілдері иеленеді. Талдау көрсеткендей, келешекте жұмыс күшіне деген қажеттілік арта түседі. Алдағы 5 жылда облыста 140-тан астам инвестициялық жобаны іске асыру жоспарланған. Оның ішінде үш ферроқорытпа зауытын ашу, ұсталық-бандаж кешенін іске қосу, ірі электрометаллургиялық зауыттың құрылысы, құрамында алтыны бар концентраттарды қайта өңдеу кәсіпорнын іске қосу көзделіп отыр. Нәтижесінде, 11 мыңнан аса тұрақты жұмыс орны құрылады.
– Слесарлар, монтаждаушылар, электриктер, құрылысшылар, жүргізушілер, механиктер сияқты жұмысшы мамандықтар – құрылыстан бастап өндіріске дейінгі экономиканың көптеген салаларына қажет. Олардың жұмыстары маңызды болғанына қарамастан, назарға жиі ілінбей қалады. Мансаптық өсу келешегі мен лайықты жалақы туралы ақпараттарды жеткізу арқылы жұмысшы мамандықтардың мәртебесін арттыруға мүмкіндік бар, – деді А.Байханов.
Осы мақсатта қала құраушы кәсіпорындардың басшыларымен бірқатар кездесу өткізілді. Олар өз кезегінде қызметкерлерді материалдық, әлеуметтік қамтамасыз ету жөніндегі бастамаларға қолдау білдірді. Олар – тұрғын үймен қамтамасыз ету, автокөлік сатып әперу, жалақыны өсіру, басқа да әлеуметтік ынталандыру. Мәселен, ERG тобы осы мақсаттарға 1,5 млрд теңге бөлуді жоспарлап отыр. Бұған қоса, биылғы жылы өңір кәсіпорындарында жалақыны арттыру болжамы бар.
Сенаттың Әлеуметтік-мәдени даму және ғылым комитетінің төрағасы Н.Жүсіп кездесу барысында айтылған барлық ұсыныстар алдағы уақытта ескерілетінін атап өтті.
Павлодар облысы
