Ағайша Исағұлова – QyzPU түлегі, ұлағатты ұстаз, композитор әрі орындаушы. Өмірін өнерімен өрнектеген ол ғылым саласына да саналы ғұмырын арнады. Халық арасында кеңінен тараған 80-ге жуық әннің авторы. Автор орындаған, шығарған, сүйемелдеген 300-ге жуық музыкалық жазба қазақ радиосы мен телевидениесінің «Алтын қорында» сақталып тұр.
Кезінде ән кештерін Венгрия, Польша, Чехия, Болгария, Германия, Литва, Украина, Белорусь, Югославия, Түркия, Тәжікстан, Өзбекстан және Ресейде өткізген өнер иесі қазақ өнерін насихаттай жүріп, ғылыми-әдістемелік, музыкалық шығармалар жазды. Осы еңбектері бүгінде жоғары оқу орындарында, мектептерде оқытылып жүр.
Қыздар университетін тәмамдап, еңбек жолын кәсіби маман тәрбиелеу ісіне арнаған ұлағатты ұстаз өзіне құрмет көрсеткен қара шаңырақтың ұжымына, ректоры Гүлмира Қанайға ризашылығын білдірді.
АЛМАТЫ
