Сурет: primeminister.kz
Ұлытау облысында Қаржы вице-министрі Дәурен Темірбековтің кәсіпкерлермен кездесуі өтті. Жиынға 200-ден астам бизнес өкілі қатысты. Кездесу барысында жергілікті кәсіпкерлер салық заңнамасына енгізілетін өзгерістерге қатысты пікір білдірді.
Жергілікті Кәсіпкерлер палатасының директоры Гүлмира Қаженова өңірлік бизнес өкілдерімен мұндай кездесулер «Халық үніне құлақ асатын мемлекет» тұжырымдамасының жұмыс істеп жатқанын көрсететінін айтты. Ол «Атамекен» ҰКП әрбір заңнамалық бастама кәсіпкерлер мен инвесторлар мүддесін ескере отырып жан-жақты талданады деп күтеді.
Сонымен қатар осындай кездесу Түркістан облысында да ұйымдастырылып, онда Ұлттық экономика вице-министрі Бауыржан Құдайбергенов өңір кәсіпкерлерімен жаңа салық реформасын талқылады. Кездесуде «BNK Group LTD» ЖШС бас директоры Ниязалы Бейсенбаев қосылған құн салығының 20%-ға көтерілуінің агроөнеркәсіп кешені өндірушілеріне ықтимал әсеріне тоқталды. «Мөлшерлеменің өсуі шағын және орта бизнеске қосымша салмақ түсіреді. Сондықтан Үкіметке кейбір басым салалар үшін дифференциалды салық мөлшерлемесін енгізу, табысы төмен кәсіпорындарға уақытша салықтық демалыс беру және көлеңкелі экономикамен күресу шараларын күшейту мәселесін қарастыруды ұсынамыз. Бұл кәсіпкерлер мен тұтынушыларға келетін теріс әсерді азайтуға мүмкіндік береді», деді кәсіпкер.
Ұлттық экономика вице-министрі қазірде аграрлық секторда шаруа қожалықтары ҚҚС төлемейтінін, ал заңды тұлғалар қолданыстағы жеңілдіктердің арқасында бюджетке төленуге тиісті салықтардың тек 30%-ын ғана төлейтінін атап өтті. Жаңа механизмдер бойынша олардың ешқайсысы ҚҚС төлемейді.
Сондай-ақ Ақтөбе облысында болған кездесуде «Атамекен» ұлттық кәсіпкерлер палатасы Сауда және қызмет көрсету салалық кеңесінің қаржылық қызмет кіші секторының басшысы Виктория Исарова: «Біз 2023 жылдан бері ұсыныс ретінде айтып келе жатқан 0% және 10% сараланған мөлшерлеме тұжырымын қабылдауды қолдаймыз. Сіздер әзірге медицинаға 10% деп отырсыздар. Басқа нұсқалар бола ма, әлде біз қазір кімді қосуға болатынын ұсына аламыз ба?» деген сұрақ қойды. Ұлттық экономика вице-министрі бұл мәселеде ҚҚС бюджетті толықтырудың негізгі көздерінің бірі екенін түсіну маңызды екенін атап өтті. «ҚҚС мөлшерлемесін арттыру және саралау бюджеттің мұнайдан түсетін өзгермелі кірістеріне тәуелділігін азайтуға және мемлекеттік басым жобаларды қаржыландыруға мүмкіндік береді. Біз ауыл шаруашылығы өнімдерін өндірушілерді ҚҚС-тан босатуды ұсынамыз. Қазіргі уақытта шаруа қожалықтары ҚҚС төлемейді және біз оны солай қалдырамыз. Ауыл шаруашылығымен айналысатын заңды тұлғалар қажетті соманың 30%-ын төлейді. Енді олар бұл салықтан босатылып, картоп, қызанақ, пияз және қырыққабат сияқты басқа да өнімдерді бәсекеге қабілетті етеді. 10%-дық мөлшерлеме кімге қатысты беріледі деген сұрақ қосымша талқылауды қажет етеді. Сондай-ақ денсаулық сақтау саласы үшін төмендетілген мөлшерлемені ұсынамыз. Барлық ұсыныс жинақталып, талқыланады, содан кейін барып өздеріңізбен бірлесіп шешіледі», деді Б.Омарбеков.
Қазірде Абай облысында 60 мыңға жуық бизнес субъектісі жұмыс істейді, оның 70%-ы – жеке кәсіпкерлер. Жергілікті бизнес өкілдерінің басқосуында облыстық Кәсіпкерлер палатасының директоры Мақсат Сүйшінов: «ҚҚС – тұтыну салығы және оны өзгерту кез келген жағдайда бағаға әсер етеді. Шағын бизнестің қажеттіліктерін ескеретін және әкімшілік кедергілерді төмендететін теңдестірілген жүйені құру маңызды. Әкімшілік кедергілерді жеңілдетпестен ҚҚС шегін төмендету қосымша жүктеме тудырады. Есептілікті автоматтандыру, есепке алудың кассалық әдісін, алдын ала толтырылған декларацияларды және кәсіпкерлерге тиімдірек жұмыс істеуге мүмкіндік беретін басқа да құралдарды енгізу қажет. Сонымен қатар салық реформасының инвестициялық климатқа әсерін ескеруі керек. Еңбекақы қорына жоғары жүктеме бизнесті көлеңкеге кетуге мәжбүр етеді. Жұмыс берушінің әлеуметтік салығы мен міндетті зейнетақы жарналарын қайта қарау жанама шығындарды азайтуға, компанияларды бейресми сектордан шығаруға және жаңа жұмыс орындарын ашуға көмектеседі. Соңғы шешімдер фискалдық мақсаттар мен кәсіпкерлікті дамыту арасындағы тепе-теңдікті ескеруі үшін мемлекеттік органдармен диалогті жалғастырамыз. Реформа бюджетті толықтырып қана қоймай, ұзақмерзімді экономикалық өсу, бизнесті дамыту және салық жүйесінің ашықтығын арттыру үшін жағдай жасауға тиіс», деді.
Кездесуде Қаржы вице-министрі Ержан Біржанов ҚҚС төлеуден кәсіпкерліктің тағы қай санаттары босатылатынын айтты.
«Қазақстандағы салық төлеушілердің жалпы саны – 2 млн. Олардың 80 мыңы ғана қосылған құн салығын төлейді. Бүгінде қосылған құн салығының шегі шамамен 80 млн теңгені құрайды және оны 15 млн теңгеге дейін төмендету ұсынылып отыр. Бұл мәселе талқылауға жатады, өйткені аталған шеңбер салық төлеушілердің едәуір санын қамтуы мүмкін – біздің есептеуімізше 200–300 мың кәсіпкер қосылады. Халықпен тікелей жұмыс істейтін салық төлеушілерді арнайы салық режіміне жатқызамыз. Яғни бүгінгі таңда жеңілдетілген режімде немесе бөлшек салық бойынша жұмыс істеген үй жанындағы дүкендер, шаштараздар, шағын киім бутиктері ҚҚС-дан босатылады», деді вице-министр.
Маңғыстау облысында өткен талқылауда жергілікті кәсіпкер, «TaxServiceKz» ЖШС директоры Жасұлан Серік: «Үкімет өкілдері аймаққа келіп, жаңа Салық кодексін түсіндіріп жатқаны өте орынды. Біз де өз ұсынысымызды айттық. Бұл жерде кәсіпкерлер мен Үкімет өз ұстанымын білдіретін пікірталас алаңы ұйымдастырылды. Кәсіпкерлердің пікірін ескеру маңызды. ҚҚС өсімі бюджетке түсетін салық түсімдерін ұлғайтуға тиіс. Алайда егер тұтыну азайып, бизнестің бір бөлігі көлеңкеге кетсе, тиімділік күтілгеннен аз болуы мүмкін», деген пікір білдірді.
Үкімет өкілдері барлық ұсыныс, пікірлер ескерусіз қалмай, жан-жақты сараланатынын айтты.
