Коллажды жасаған – Қонысбай ШЕЖІМБАЙ, «EQ»
Бұл – солтүстік көршіміздің былтырғы алапат су тасқынынан сабақ алып, ертерек қам жасаған қарекеті. Қазірдің өзінде Иреклі суқоймасы 76%-ға толып тұр. Былтыр көктемде күрт еріген қар суы қоймадан шығып үлгермей, жолындағының бәрін жайпап, Жайық өзенінің жоғарғы жағындағы халықты да біраз әбігерге салды.
Облыс басшылығы Ресей Федерациясының Орынбор, Саратов облыстарындағы гидротехникалық кешендердің жай-күйі, төменге түсіп жатқан су мөлшері туралы күнделікті ақпарат алмасып отыр. Облыс әкімі бастаған арнайы делегация Орынбор облысының мүдделі ведомстволарымен кездесіп қайтты.
Көп жылғы есептеуге қарағанда, Ирекліден құлаған су Батыс Қазақстан облысына жеткенше бір айдай уақыт өтеді. Мамандар әзірге тасқын қаупі жоқ екенін айтып отыр. Қазір Орал қаласының тұсында судың деңгейі 1,6 метр ғана. Су 6 метрлік деңгейден асқанда ғана арнасынан шығып, саяжайларды баса бастайды.
Жақында облыс әкімдігінде көктемгі су тасқынының алдын алу бойынша мәжіліс өтті. Гидрологтер, метеорологтер, төтенше жағдай қызметі алдағы ықтимал тасқынның болжамын жасап, дайындықты күшейткен.
«Наурыз айында күн күрт жылынып, нөсер болса, тоң еріп үлгермей, су жерге сіңе алмай, еріген қар суынан тасқын пайда болуы мүмкін. Әсіресе Орал қаласында, Тасқала, Қазталов, Теректі, Бөрлі, Шыңғырлау, Сырым, Қаратөбе, Ақжайық, Бәйтерек аудандарында тасқын қаупі жоғары», дейді облыс әкімінің орынбасары Бақытжан Хаберұлы.
Бүгінде облыста су басу қаупі бар 186 елді мекен есепке алынған. 2025 жылғы су тасқыны кезеңінде елді мекендерді қарғын судан қорғауға 3,9 млрд теңгеге жалпы ұзындығы 107 шақырым 53 қорғаныс бөгеті тұрғызылған. Оның ішінде Шыңғырлау өзенінде ұзындығы 25,2 км 8 бөгет, Қалдығайты өзенінде 3 км 2 бөгет, Өлеңті өзенінде 6,5 км, Бұлдырты өзенінде 1,2 км, Елек өзенінде 13,2 км 5 бөгет, Қайыңды өзенінде 1 км, Жақсыбай өзенінде 3,2 км, Сарыөзенде 0,5 км, Быков өзенінде 3 км бөгет салынды. Жайық өзені жағалауларына жалпы ұзындығы 23,8 км 14 бөгет түсті. Далада еріген қар суын қауіпсіз жақтарға бағыттауға арналған 26,4 км 18 бөгет соғылған. Сонымен бірге 9 км су бұру каналы, 93 км арық салынды, елді мекендердің ішінде 582 метр су өткізу құбырлары орнатылды. 74 км магистралдық каналдар тазартылды. Көшім, Быков өзендерінің түбін тереңдету, тазалау жұмысы жүргізілді.
Батыс Қазақстан облысы
