Сурет: halyq-uni.kz
Ертіс-Баян өңірінің көкөніс өсірушілері былтыр 176 мың тонна сәбіз жинапты. Бұл көлем еліміздің барлық өңірін қамтуға жеткілікті. Алайда әлеуметтік желіде павлодарлық фермерлер өз өнімдерін еліміздің оңтүстік өңірлеріне жібере алмай отырғанын, себебі Ресейдің арзан көкөнісі аймақтарды жаулап алғанын жазып жатыр. Өндірушілер сәбіздің килосын тіпті 65–85 теңгеден өткізе алмай отырмыз деп мұң шағады. Әлеуметтік желіде тарап кеткен бейнежазбадан көкөніс сақтау қоймаларында тау-тау болып үйіліп жатқан сәбіздің бұзыла бастағанын көруге болады.
Агроөнеркәсіп кешеніндегі аумақтық инспекцияның ресми мәліметіне сүйенсек, Павлодар облысына өзге мемлекеттерден сәбіз әкелінбеген.
«Өңірлік Ауыл шаруашылығы басқармасының мамандары «Рахмет» базарына мониторинг жүргізіп, ондағы сәбіздің жергілікті көкөніс өсірушілерден ғана келіп түсетінін анықтады. Фермерлердің қоймаларында сәбіз баршылық. Ауыл шаруашылығы басқармасы өнімді сыртқа сатуға көмек көрсету туралы Ауыл шаруашылығы, Сауда және интеграция министрліктеріне, облыс әкімдіктері мен әлеуметтік-кәсіпкерлік корпорацияларына хат жазды. Онда сәбіздің көлемі мен шаруа қожалықтарының байланыстары көрсетілген», деп хабарлады Павлодар облысы әкімінің баспасөз қызметі.
Ауыл шаруашылығы басқармасы басшысының орынбасары Төлеген Көшербаев жағдайдың мұндай болатынын жыл басында-ақ болжаған едік дейді. Жауапты ведомстволарға хат жазылғанымен, нарықта әзірге өзгеріс байқалмайды. Шаруалар былтыр жинаған өнімнің 100 мың тоннасын ғана сатып үлгерген.
«Өкінішке қарай, Павлодар, Ақтоғай, Железин аудандары мен Ақсу қаласының ауылдық аймағындағы көкөніс сақтау қоймаларында 50 мың тонна сәбіз қалып отыр. Өңір тұрғындары бір жылда шамамен 17 мың тонна, оның ішінде қыс пен көктем кезеңінде 10 мың тонна сәбіз тұтынады. Жергілікті нарықтағы өнімнің барлығы өзіміздікі», дейді мекеме өкілі.
Шаруалар Үкімет өзге елдермен байланыс орнатып, шұғыл түрде экспорт мәселесін шешіп берсе деген тілек айтады. Болмаған жағдайда, өнім күн жылына бұзылып, тұтынуға жарамсыз болып қалады. Қазірдің өзінде қоймалар оларды іріктеуге көшкен. Айтпақшы, көрші елдің ресми ақпарат құралдарына құлақ түрсек, қаңтарда Ресейдің Волгоград облысынан 880 тонна сәбіз елімізге сатылған. Ал 2024 жылы Өзбекстан Қазақстанға 50 мың тоннадан астам сәбіз экспорттаған. Бір ғана Павлодар облысы республикада өсіп шығатын сәбіздің 40 пайызын беріп отырғанын айтуымыз керек. Ал ол көлем ел халқының сұранысын артығымен орындайды.
Бірақ баға жағынан алғанда Ресейдің өнімі отандық өнімнен арзан. Көршілерде картоптың көтерме бағасы – 11 рубль (61 теңге). Соған орай отандық өнім ірі дүкендер желісінен тықсырылып қалып жатыр.
Павлодар облысы
