Суретті түсірген – Ерболат ШАДРАХОВ
Газетіміздің өткен сандарының бірінде (7 наурыз 2025 жыл) Маңғыстауда аталған орындарда саяхат яки визит орталығы салынатынын хабарлаған едік. Сәуірдің самала күндерінің бірінде «Бозжыра» шатқалында жаңа туристік жобаның қазығы қағылып, құрылыс жұмыстары басталды.
– Мемлекет басшысы Қасым-Жомарт Тоқаев Бозжыра секілді тарихи, көрікті орындарда туризмді дамыту туралы нақты тапсырма берген болатын. Осы бастаманың алғашқы қадамы жасалып жатыр. Мұндай сұлулығы көз тартар мекендер әлемде санаулы ғана. Біз тарихи тамырын сақтай отырып, бұл жерді заманауи туристік орталыққа айналдыруды көздеп отырмыз. Туристер үшін қолайлы жағдай жасау бір міндет болса, негізгі мақсатымыз – жергілікті тұрғындардың бұл жобаның игілігін көруіне мүмкіндік жасау. Жақын маңдағы елді мекен тұрғындары ауылшаруашылық өнімдерін сатып, қосымша табыс таба алады. Бұл жоба аймақтың туристік әлеуетін дамытып қана қоймай, өңір экономикасына оң серпін береді деп сенеміз, – деді визит-орталықтың іргетасын қалау іс-шарасына арнайы барған Маңғыстау облысының әкімі Нұрдәулет Қилыбай.
Тұрғындарды алаңдатқан басты мәселе көрікті нысанның табиғи қалпына нұқсан келуі және экологиялық өзгерістердің орын алуы мәселелері еді. Өңір басшысы да, кешен құрылысын жеке қаражатына жүргізетін отандық «Pana Asia» ЖШС басшылығы да бұл сұрақтарға нақты жауап берді. Айтуларынша, түпнұсқаға нұқсан келмейді және экологиялық талаптар сақталады. «Визит-орталық қоршаған ортаға зиян келтірмейтіндей етіп жобаланған. Биологиялық тазарту жүйелері, қоқысты сұрыптап жинау, күн энергиясын пайдалану сынды шешімдер көзделіп отыр. Туристерге барлық жағдай жасау – басты мақсатымыз. Сонымен қатар қазақтың ұлттық тағамдары мен құндылықтарын насихаттауға да мән береміз», дейді жоба жетекшісі Сәуле Жаңабаева.
Жобада 17 глэмпинг павильоны, 50 қонақүй бөлмесі, жалпы аумағы 450 шаршы метр болатын визит-орталық пен этно-кафе қарастырылған. Заманауи үлгіде салынатын визит-орталықта саяхаттаушыларға барлық жағдай қарастырылады. Мұнда келушілер орталығы, этно-дәмхана мен глэмпингтер бой көтермек.
Өңірдің туристік әлеуетін дамытуға бағытталған кешен 2027 жылы пайдалануға беріледі деп жоспарланып отыр. Сонымен қатар Бозжыра шатқалына барар жолда орналасқан жол бойында қызмет көрсету орталығының құрылысы да жүріп жатыр. Аумағы 12 гектарды қамтитын нысанда туристерге арналған ақпараттық тақталар, қоғамдық тамақтану орны мен шағын демалыс қалашығы қарастырылған бұл нысан 2026 жылы қолданысқа берілмек.
Сол күні-ақ Бозжыраға саяхаттап келген француздық велошабандоздар шоғыры «Бозжыра» визит-орталығының алғашқы іргетасын қалау рәсіміне куә болды. Маңғыстау меймандары өңірдің көрікті табиғатын тамашалауға келетін туристерге қолайлы жағдай жасалып жатқанына қуанышты ықыласын жеткізіп, бастамаға сәттілік тіледі.
Туристердің топ басшысы француз велосаяхатшысы, кинорежиссер Седрик Тассан – бұған дейін Орталық Азия елдерінде бірнеше мәрте болған кәнігі саяхатшы. Ол үш жыл бұрын Маңғыстау даласын жалғыз өзі велосипедпен жүріп өткен екен. Сол сапардан алған ерекше әсерін өз достарына жеткізіп, таңғажайып сұлулықты көзбен көру үшін биыл достарын Маңғыстауға бастап келіпті. Ал өңірге алғаш келген Седриктің саяхатшы достары Маңғыстаудың тамаша табиғатына, Бозжыра шатқалының қайталанбас келбетіне ерекше таңданыстарын қуана жеткізді.
Маңғыстауда далалық жерлерге визит-орталықтардың салынуы – саяхатшылар үшін қуанышты жаңалық, бұл оқиғаны көрген-білген, куә болған олар елдеріне барып достарына жар сала айтып, тобын көбейтіп тағы қыдырып келері анық. Ал визит-орталықтарда туристерге сервистік қызмет көрсетіп, тағам түрлерін сатып табыс табатын жергілікті тұрғындар үшін жұмыс көздері де ашылады деп күтеміз.
Маңғыстау облысы
