Суретті түсірген – Жұмабай МҰСАБЕКОВ
Бүгінде облыстың әлеуметтік-экономикалық даму көрсеткіші артып, ауылды аймақтарға көбірек көңіл бөліне бастады. Бұл Мемлекет басшысының «Қуатты аймақтар – қуатты мемлекет» тұжырымдамасының бір бағыты ретіндегі маңызды қадамы. Мысалы, облыс құрылғанға дейін Жетісу өңірінде небәрі 5 елді мекен газдандырдырылған болса, бүгінде қосымша 58 ауылға газ жеткізілді. Осылайша, 63 елді мекенге газ тартылды, оның 30-ы көгілдір отынға өткен жылы қол жеткізген.
«Облысымызда орталықтандырылған сумен қамтамасыз ету деңгейі 91,35%-ға жетіп, былтыр су жүйесіне 2 ауыл қосылды. 298 км желі жөнделді, 17 елді мекенде ауызсудың сапасы жақсарды. «Ауылдық денсаулық сақтауды жаңғырту» Ұлттық жобасы аясында 23 жаңа медициналық нысан бой көтерді. Спорт саласында 18 нысан іске қосылып, 10 блок-модульді спорт кешені орнатылды. Облыстық маңызы бар 193 шақырым жол мен 54 елді мекеннің ішкі көшелері жөнделді», дейді облыстық мәслихаттың төрағасы Гүлнәр Қожағұлқызы.
Газдандыру – Президенттің тапсырмасына сай облыс басшылығы ерекше мән беріп отырған басым бағыттардың бірі. Соған сәйкес, газдандыру деңгейі 27%-ға артып, 56,5%-ға жеткен. Облыс әкімі баспасөз қызметінің мәліметінше, жыл соңына дейін өңірде газдандыру деңгейі 71,4% болмақ. Панфилов ауданын қоса алғанда, Кербұлақ ауданынан Талдықорғанға дейінгі 500 мыңнан астам халқы бар 126 елді мекен газға қол жеткізеді.
2024 жылдың тамызында «Талдықорған–Үшарал» магистралды газ құбырының құрылысы басталған. Бұл жобаны іске асырудың нәтижесінде Алакөл, Ақсу, Сарқан аудандарының 66 елді мекені газбен қамтамасыз етілмек. Өңірді табиғи газбен қосымша қамтамасыз ету үшін «Алматы–Талдықорған» лупингісінің (екінші тармағының) құрылысын салуға қатысты дайындық жүргізіліп жатыр. Газдандыру ісі барысында 1 800-дей тұрақты және уақытша жұмыс орындары ашылған.
Биыл Ескелді ауданы толықтай газбен қамтылады. Онда кейінгі екі жылда 39 мыңнан астам тұрғынның көгілдір отынға қол жеткізуіне мүмкіндік жасалған, яғни газдандырылуға жататын 21 елді мекеннің 12-сіне газ құбыры тартылған.
«7 елді мекенде – Көкжазық, Теректі, Қаратал, Абай, Шымыр, Жастар, Ақтасты ауылдарында газ тарату желілерін салу жұмыстары жүргізіліп жатыр. Оның ішінде 5 елді мекеннің жұмыстары бітіп, халық игілігін көріп отыр. Көкжазық, Теректі ауылдарында биыл аяқталады», деді облыс басшысы Бейбіт Исабаев.
Оған қоса Қайнарлы мен Жалғызағаш ауылдарына газ тартуға республикалық бюджетке өтінім ұсынылған. Соның нәтижесінде жыл аяғына дейін жалпы саны 48 мың адам тұратын 21 елді мекен газға толық қол жеткізеді.
Қабылданған шаралардың нәтижесінде бәсекелестік ортаны дамыту арқылы газ қостыру құнын, қазандық пен қажетті жиынтықтарды қоспағанда, 170-175 мың теңгеге дейін төмендетуге мүмкіндік туды. Сонымен қатар бір жарым жылдың ішінде 1 600 газ қазандығын сатып алуға 500 млн теңге бөлінген. Тұрғындарға қазандықтың төлемін 10 айға дейін бөліп төлеуге жеңілдік жасалып отыр.
«Ауданда барлығы 63 елді мекен бар, оның 26-сы газдандыруға жатады. Сарыөзек ауылы тұрғындарының 34,8%-ы газға қосылған. Тұрғындарды көгілдір отынмен қамтамасыз ету мақсатында Сарыөзек ауылына газ құбырлары тартылып, 3 102 үйді көгілдір отынмен қамту мүмкіндігі бар. Барлығы 1 080 тұрғыны бар көпқабатты үй газға қосылып, 984 үйді газға қосу бойынша техникалық шарт берілген. Ауылда 29 газ тарату шкафы орнатылған, оның 9-ы коммерциялық, 17-сі абоненттердің пайдаланылуында», дейді Кербұлақ ауданының әкімі Қанат Есболатов.
Жалпы, 2029 жылға қарай Жетісу облысында газдандыруға жататын 192 елді мекенге толықтай газ тартылады. Соның нәтижесінде 624 мыңнан астам тұрғын немесе өңір халқының 91%-ы көгілдір отынға қол жеткізе алады.
Талдықорған халқының 90,3%-ы газға қосылуға мүмкіндік алған, соның 69%-ы немесе 37,8 мың абонент газ қостырған. Орталықтандырылған ауызсумен қамту деңгейі 98%-ды құрап отыр. Ынтымақ ауылы, 3-бөлімше, «Пригородный», «Экспедиция», «Үйтас» саяжай алабы, «Жастар-2» шағын ауданы, Ынтымақ тұрғын алабы мен Мойнақ ауылы көгілдір отынмен қамтамасыз етілген.
«Қала маңындағы «Алмалы», «Ащыбұлақ», «Мерекелік», «Қызылтас», «Балықты», «Қаратал» саяжайлары мен 1-бөлімшеге газ тартудың жобалық-сметалық құжаттамасы дайындалып жатыр, келесі жылы құрылысын бастаймыз. Ауызсуға келсек, орталық су жүйесіне қосу деңгейі қазір 98%. Келесі жылы Ынтымақ тұрғын ауданында кәріз жүйесінің құрылысын аяқтаймыз. Сондай-ақ Еркін ауылы мен 1-бөлімшеде сумен қамту жүйесін сала бастаймыз», дейді облыс басшысы.
Жетісу облысы
