Жалпы, өңірде 2024–2025 жылдарғы жылыту маусымы штаттық режімде өтті. Апаттық жағдайлар болған жоқ. Бұған негізінен қатты аяздардың болмауы оң әсер етті. Тұрғындардың жылуға қатысты шағымы 55%-ға азайған.
Облыстық энергетика және тұрғын үй-коммуналдық шаруашылық басқармасының басшысы Ержан Иманзаиповтің мәлімдеуінше, өңір тұрғындарын сапалы жылумен қамтамасыз ету, сондай-ақ алдағы жылыту маусымында жылу желілеріндегі гидравликалық, температуралық режімдерді жақсарту мақсатында 16,1 млрд теңгеге 31 шақырымнан астам желіні жаңарту жоспарланып отыр. Павлодарда № 5 сорғы стансасын салу, 5 км магистралдық жылу желілеріне, 10,6 км орам ішіндегі желілерге күрделі жөндеу жүргізу көзделген. Екібастұзда ЖМ-2, ЖМ-7 қайта жаңартылады, жылу желілері күрделі жөндеуден өтеді. Ақсу қаласының № 3, №5, №8 шағын аудандарының орам ішіндегі жылу желілері қайта жаңартылып, жылу желілеріне күрделі жөндеу жүргізіледі.
Өңір басшысы Асайын Байханов №1 ЖЭО-дағы апаттық тоқтаулардың өсу динамикасына, Ақсудың РОК-2 жылу көзіндегі негізгі жабдықтардың тоқтауына байланысты параметрлердің төмендеуіне алаңдаушылық танытып отыр. Бұл түйткілдер өз кезегінде тұрғын үйлердегі жылу жетіспеушілігіне соқтырған. «ЕЭК» АҚ директоры, Ақсу МАЭС «Энергетика» дивизионының бас операциялық директоры Дүйсен Мерғалиев негізгі себеп ЖЭО-дағы №1, №5, №6 қазандықтарының апаттық жөндеуге жиі шығуынан болғанын айтады. Осындай жағдайлардың қайталануын болдырмас үшін биыл №1 ЖЭО стансасын жөндеуге 13 млрд теңге бөлінді. Сондай-ақ негізгі қазандықтарды бүтіндеуден бөлек, РОК-2-нің қосалқы жабдығына қосымша 1,5 млрд теңгеге жөндеу жүргізілмекші.
Павлодар облысы
