Топ ішіндегі оңтайландыру: бүгінгі ахуал қандай?
Оңтайландыру жұмысының нақты мысалының бірі – «KEGOC» АҚ 100% еншілес ұйымы болып саналатын «Энергоинформ» АҚ компаниясын қайта құрылымдау туралы шешімі болды. Осылайша, компанияны KEGOC құрамына енгізу жоспарланып отыр. Бұл өз кезегінде басқару құрылымын жеңілдетіп, энергетика секторы жұмысының тиімділігін арттыруға мүмкіндік береді.
«Энергоинформ» АҚ ақпараттық-телекоммуникациялық жүйені дамытумен айналысады және энергетика саласындағы кәсіпорындарда ақпараттық жүйелерді басқару мен аппараттық-бағдарламалық кешендерді автоматтандыру және цифрландыруға қатысты жобаларды жүзеге асырады.
«Бұл компания мен барша қызметкерлер, серіктестер үшін маңызды шешім болды. Кез келген өзгеріс қызметкерлер мен барлық тараптың мүдделерін барынша ескере отырып енгізілетініне сенімдіміз», – деп атап өтті «KEGOC» басшысы Нәби Айтжанов.
Бұл ретте, «KEGOC» ірі инфрақұрылымдық жобаларды жүзеге асыру жұмысын жалғастырып жатыр. Олардың арасында Қазақстанның БЭЖ-нің Оңтүстік аймағының электр энергетикалық жүйесін күшейту мен Батыс аймақты еліміздің БЭЖ-сімен біріктіру бастамасы бар. Екі жоба да 2027 жылы аяқталады деп жоспарланып отыр.
Бейінді емес құрылымдарды тарату жұмысы қатар жүреді
Бұған дейін «Самұрық-Қазына» қорының өкілдері «Самұрық-Қазына Бизнес Сервис» ЖШС-ін тарату жоспары туралы мәлімдеген еді. Бұл компания сервистік қызметтерді ұсыну мақсатында құрылған-ды.
«Самұрық-Қазына» АҚ басқарма төрағасы Нұрлан Жақыпов қор активтер құнын арттыру, бейінді емес ұйымдарды тарату және нарыққа қарай икемделіп, бағдарланған құрылымды қалыптастыру бойынша жұмыстарды жалғастырып жатқанын атап өткен еді.
Экономиканы либерализациялау бағдары
Мұндай қадамдардың барлығы Президент Қасым-Жомарт Тоқаев белгілеген жалпы стратегияның бір бөлігі болып саналады. Экономиканы либерализациялау бағдары мемлекеттің бизнестегі үлесін кезең-кезеңімен азайтып, бірқатар функцияларды жеке секторға беруді көздейді. Бұл тиімді басқаруды күшейтуге, бәсекелестікті арттыруға және отандық кәсіпкерлер үшін жаңа мүмкіндіктер ашып, шетелдік инвесторлардың келуіне қолайлы жағдай жасауға ықпал етуі тиіс.
Қазіргі таңда «Самұрық-Қазына» АҚ активтерінің көлемі бойынша топ-25 қатарына кіреді. 2021 жылдан 2024 жылға дейінгі орташа жылдық табыс өсімі 13%-ды, ал EBITDA – 5%-ды құрады.
2024 жылы мемлекет пайдасына 1,354 триллион теңге қаржы аударылды. Бұл көрсеткіш еншілес компаниялардан алынған дивидендтер көлемінен 6 есе көп болып отыр.
Негізгі мақсат – басқарудағы активтер құнын арттырып, тікелей шетелдік инвестицияларды тарту.
Майнұр Жанақова
