Жуырда Сирия мен Израиль арасындағы Голан жоталарында бір жылдық бітімгерлік миссиясын ойдағыдай аяқтаған бір топ әскери қызметшіміз елге оралған соң, оларды Жоғарғы Бас қолбасшы Қасым-Жомарт Тоқаев қабылдағаны белгілі. Сол кездесуде Мемлекет басшысы: «Бұл әскеріміздің аса күрделі міндеттерді орындауға қабілетті екенін көрсетеді. Сіздер Сирия дағдарысының шешуші сәтінде ұтымды әрі батыл әрекет жасадыңыздар. Қазақстан армиясының кәсіби деңгейі жоғары екенін дәлелдеп бердіңіздер. Сол күндері қазақ жауынгерінің асқақ рухы мен қайсарлығына бүкіл әлем куә болды», деп баға беріп, бірқатар офицер мен сарбазды Голан жоталарында көрсеткен ерлігі мен жанқиярлығы үшін мемлекеттік наградалармен марапаттады.
Солардың бірі – Қорғаныс министрлігі Бітімгерлік операциялар орталығының басқарма бастығы, Сирияға аттанған алғашқы ұлттық бітімгерлік контингенттің командирі, подполковник Жігер Айыпов. Президенттің қолынан Сағадат Нұрмағамбетов атындағы I дәрежелі «Айбын» орденін кеудесінен таққа кейіпкеріміздің айтуынша, әу баста оның әскери саланы таңдауына Шығыс Қазақстан облысының Қатонқарағай ауданындағы балалық шағы өткен Өрелі ауылының шекара заставасына жақын орналасуы себеп болыпты.
«Бала күнімнен әскери киімдегі шекарашыларды көріп, солар сияқты болуды армандайтын едім. Осы арманым алға жетелеп, Астанадағы Сағадат Нұрмағамбетов атындағы «Жас ұлан» республикалық мектебіне оқуға түстім. 2004 жылы оны бітірген соң, Ресейдегі әуе-десанттық училищесінде білім алдым», дейді ол.
2009 жылы елге оралған Жігер Мұратұлы Аэроұтқыр әскерлері қатарын толықтырады. Кейін десанттық-шабуылдаушы әскерлер болып қайта құрылған осы әскери құрылым қатарында Талдықорған, Қонаев, Алматы қалаларында взвод командирінен бастап Бітімгерлік полктің штаб бастығына дейінгі түрлі қызмет тізгінін ұстаған соң, 2022 жылы Қорғаныс министрлігі Бітімгерлік операциялар орталығының Оқу үдерісін қамтамасыз ету басқармасының бастығы лауазымына тағайындалады. Содан былтыр еліміздің тұңғыш ұлттық бітімгерлер контингентін бастап Голан жоталарына аттанды.
«Шетелге бітімгер ретінде баруға, әрине, әскери қызметшінің өз қалауы болуы керек. Егер адам өзі барғысы келсе, ол алдымен қатаң іріктеуден өтеді. Біріншіден – медициналық, екіншіден – психологиялық, үшіншіден – дене дайындығы тексерісінен сүрінбеуі қажет. Сондай-ақ мамандығы бойынша сынақ тапсырады. Бұған қоса офицерлер мен сержанттар міндетті түрде ағылшын тілін білуі керек», дейді кейіпкеріміз.
Былтыр 14 наурызда 139 адамнан тұратын бітімгерлік контингенті Алматы қаласынан Голан жоталарына жеткен соң, сол жақта бір жыл бітімгерлік миссиясын аяқтаған Ирландияның контингентін алмастырған. Жалпы, Сирия мен Израиль арасындағы даулы аймақ саналатын бұл өлкеде Қазақстаннан бөлек, Үндістан, Непал, Аустралия секілді 12 елдің де әскерилері қызмет өткеріп жатыр.
«Біз Голан жоталарында орналасқан Біріккен Ұлттық Ұйымы миссиясы қолбасшысының ре-зерві ретінде қызмет еттік. Басты мақсатымыз – Израиль мен Сирия арасындағы атысты тоқтату туралы келісімнің сақталуын қадағалау. Осы мақсатта біздің қарамағымыздағы БҰҰ полкпосттарын күзету, патрульдеу, жарылыс қаупі бар заттарды жою, сондай-ақ БҰҰ персоналдарын алып жүру мен эвакуациялау жөніндегі міндеттерді орындадық», дейді ол.
Ж.Мұратұлының айтуынша, жергілікті халық қазақ жауынгерлерін «Бейбарыс сұлтан мен әл-Фарабидің ұрпақтары келді» деп құрметпен қарсы алған.
«Сириялықтардың қазақтарға деген көзқарасы жақсы екен. Бізге үнемі жылы ілтипат білдіріп тұрды. Біз ол жақта жүріп бейбітшілік деген ұғымның қадірін түсіндік. Бұл – менің ғана емес, бірге болған барлық әріптесімнің пікірі. Елдегі бүгінгі тыныштық пен татулықты бағалау керек деген ой түйіп қайттық. Кез келген нәрсенің құны салыстыру арқылы белгілі болады ғой. Сириядағы халықтың өмірін, болып жатқан түрлі жанжалды көріп, «Жақсы даудан жаман бітім артық» деген тәмсіл еске түсті», дейді подполковник.
Сәуір айында еліміздің алғаш-қы дербес ұлттық контингенті қайтып оралған соң, 139 адамнан тұратын екінші контингент Сирияға аттанған еді. Олардың алдына да бірінші құрамға жүктелген міндеттер қойылып отыр.
«Бізді Жоғарғы Бас қолбасшымыз, еліміздің Президенті Қасым-Жомарт Кемелұлы қабылдап, ізгі сөздерін арнап, кеудемізге марапат таққаны менің өмірімдегі ең қуанышты сәттің бірі болды. Әрбір әскери қызметші үшін еңбегінің бағаланғанынан артық сый жоқ. Мемлекет басшысына, Қорғаныс министрлігі басшылығына бізді үлкен құрметпен қарсы алып, марапаттағаны үшін жеке құрамның атынан алғысымды білдіремін», деді Ж.Айыпов.
Оның айтуынша, шын мәнінде, бір жыл бойы шет жерде жүріп жинақтаған тәжірибе – отандық әскери қызметшілер үшін құнды жетістік. Алдағы мақсат – осы тәжірибені әскери салаға енгізіп, ізбасар жауынгерлерді де бітімгерлік қызметке баулу. Бұл армиямыздың күш-қуатын одан әрі арттырумен қатар, Қазақ елінің бейбітсүйгіш мемлекет екенін дүниеге әйгілемек.
