Ағымдағы жылдың алғашқы төрт айында өндіріс көлемі 45 628 бірлікті құрады – бұл өткен жылдың сәйкес кезеңімен салыстырғанда (22 583 бірлік) екі есеге жуық артық. Қазірде елімізде автокөлік өндіретін сегіз ірі кәсіпорын: Қостанай қаласындағы «СарыарқаАвтоПром» ЖШС (Allur), Сарань қаласындағы «QazTehna» ЖШС, Алматы қаласындағы «Hyundai Trans Kazakhstan» ЖШС және «Hyundai Trans Auto» ЖШС, Семей қаласындағы «СемАЗ» ЖШС және «Daewoo Bus Kazakhstan» ЖШС, Көкшетау қаласындағы «КамАЗ-Инжиниринг» АҚ, және Орал қаласындағы «Уральскагрореммаш» АҚ жұмыс істейді.
Салада автокомпоненттік базаға ерекше көңіл бөлінуде. Өткен жылы Сарань қаласында Tengri Tyres шина зауыты, Алматыда Kazakhstan Mobility Engineering зауыты (мультимедиялық жүйелер өндірісі) және Almaty Autoparts Production зауыты (автоорындықтар өндірісі) іске қосылды. «QazTehna» ЖШС шанақ бөлшектерін штамптайтын жабдықты жеткізуге келісімшарт жасаса, «Qarmet» АҚ базасында автокөлік болатын шығару жоспарланып отыр. Бұл жобалар жүздеген жаңа жұмыс орнын ашуға мүмкіндік беріп, саланың технологиялық әлеуетін арттырмақ.
Сол секілді қазіргі сәтте Жетісу облысындағы «Қайнар-АКБ» ЖШС шығарған аккумуляторлар белсенді қолданылып, Hyundai құрастыру желілерінде сынақтан өтіп жатыр, ал болашақта Kia көліктеріне де қолданылуы мүмкін. «СарыарқаАвтоПром» зауытында отандық компоненттер – «Вектор Павлодар» ЖШС өндірген құйма дискілер мен Tengri Tyres шиналары сәтті қолданылуда. Сонымен қатар Hyundai Trans Kazakhstan және Allur өндірістік желілері жаңғыртылып, роботтандырылған жүйелер енгізілді, дәнекерлеу, сырлау және құрастыру учаскелері жаңартылды.
Оқшаулау деңгейін арттыру мақсатында «СарыарқаАвтоПром» екі ірі автокомпоненттік өндіріс орталығын құру жобасын іске асырып жатыр. «Tehnopark.kz» ЖШС базасындағы 1-ші Локализациялау орталығы жалпы 30 000 шаршы метр аумақты қамтыса, «ProProduction» ЖШС базасындағы 2-ші Локализациялау орталығы 25 000 шаршы метрге орын тепкен. Бұл өндірістік алаңдарда интерьер мен экстерьерге арналған пластикалық бөлшектер, салонның ішкі сәндік әрлеуі, дыбыс өшіргіш, электр сымдары, орындықтар, герметик, мастика және шығару жүйелері өндірілетін болады. Орталықтардың іске қосылуы импортқа тәуелділікті азайтып, Қазақстанның автокөлік өнеркәсібіндегі позициясын нығайтуға септігін тигізеді.
Мемлекет сала дамуын нормативтік-құқықтық базаны жетілдіру, тарифтік және бейтарифтік ынталандыру шараларын енгізу, сондай-ақ кооперациялық байланыстарды нығайту бағытындағы жүйелі жұмыстармен ұдайы қолдап отыр. 2010-2020 жылдары жүзеге асқан өнеркәсіптік жинақтау туралы келісімдер аясында қазақстандық автозауыттар дәнекерлеу мен сырлау процестерін жолға қойып, жоғары деңгейдегі локализацияны және саланың технологиялық жетілуін көрсетті.
