Суретті түсірген – Мәди ҒҰБАЙДУЛЛИН
Нұрлыгүл Өтемісқызының сахналық ғұмыры Орал театрымен бірге жасасып келе жатыр. Өнер ұжымының белді мүшесі, Мәдениет саласының үздігі атанған сахна шебері талай мәрте халықаралық, республикалық байқаулардың бас жүлдесін жеңіп алған.
Мемлекеттік сыйлықтың лауреаты Сердеш Қажымұратов қойған «Әпке» пьесасы бұдан ондаған жыл бұрын Орал театрының сахнасында қойылып, көрермен көңілінен шыққан болатын. Нұргүлдің қайраткерлік болмысын, қажырлы да қайсар мінезін ашатын осы қойылымды мерейтой иесі қайта «тірілтті». 10 жылдан кейін актриса «Қамажай» рөліне қайта оралып, көрерменмен қауышты. Бұл кеш — театрсүйер қауым үшін де, сахна үшін де ерекше сәтке айналды. Актрисаның жүректен шыққан шынайы ойыны көрерменге ерекше әсер сыйлады.
«Қойылымды 10–12 жыл бұрын да тамашалап едім. Бірақ бүгін жаңадан көргендей болдым. Актриса өз рөлін жарқыратып ойнады, нағыз образға ену дегенді көрсетті. Оның ойнағаны рөлдегі әпке ме, шынайы әпке ме, ажырату қиын. Тұтас қойылымды өзінен тартып, басты рөлді сомдау дегеннің не екенін көрсетті. Нағыз актриса екенін тағы да мойындатты» дейді қойылымды көріп шыққан Светлана Бақышева.
Мерейтой аясында актрисаның өнер жолы бейнеленген шағын көрме, деректі фильм көрсетілді. Ал кеш соңында Батыс Қазақстан облысы әкімінің орынбасары Қайыржан Меңдіғалиев сахнаға шығып, өнер шеберіне құрмет көрсетті. Облыс басшысының атынан құттықтау айтып, мерейтой иесінің иығына шапан жапты. Театр қайраткерлері одағы Батыс Қазақстан облыстық филиалының төрағасы Эльмира Мақашева ұйым жетекшісі, Қазақстанның Халық әртісі Тұңғышбай Жаманқұловтың атынан құттықтау хат тапсырды.
Батыс Қазақстан облысы
