Суретті түсірген – Ақаділ Рысмахан
Тоғыз жолдың торабында орналасқан Шу қаласында локомотив жөндеумен айналысатын алғашқы техникалық қызмет көрсету депосы ашылды. Депо жылына 1 500-ден астам локомотив жөндеуге қауқарлы. Көлік саласындағы жаһандық көшбасшы компаниялар санатына енген «Alstom» ұжымы жаңа депоны салу үшін 3,5 млрд шамасында инвестиция құйған. Осылайша, франциялық компания араға 37 жыл салып елімізде техникалық қызмет көрсету кәсіпорнын ашып, жұмысты жандандыруға бел буып отыр.
Дерекке сүйенсек, компания өкілдері заманауи үлгіде бой көтерген цифрлық депо құрылысын екі жыл бедерінде аяқтаған.
«Жаңа нысанның ашылуы Қазақстан мен Франция арасындағы іскерлік байланыстың өркендегенін көрсетеді. Біздің компания «Қазақстан темір жолы» компаниясымен 15 жыл бойы үздіксіз жұмыс істеп келеді. Жаңадан ашылған техникалық қызмет көрсету депосы – екі ел арасындағы берік байланыстың жемісі. Осы орайда Қазақстан билігі тарапынан инвесторларға барынша жақсы жағдай қарастырылғанын айта кеткен ләзім. Қазір Қазақстанда жалпы құны 25 млрд теңгені құрайтын 4 жобаны іске асыру бойынша жұмыс істеп жатырмыз», дейді «Alstom» компаниясының Батыс және Орталық Азия бойынша басқарушы директоры Жером Бойе.
Өңір басшысы Ербол Қарашөкеевтің айтуынша, өңірге тікелей шетелдік инвестиция тарту жұмысы жалғаса береді. Әсіресе жаңа өндіріс орындарын ашу үшін бірнеше жобаны жүзеге асырудың тетіктері қарастырылған.
«Мемлекет басшысының тапсырмасына сәйкес, өңірде ауқымды инвестициялық жобалар жүзеге асырылып жатыр. Кейінгі жылдары бірнеше жаңа өндіріс ошағы іске қосылып, жергілікті халықты жұмыспен қамту шараларына басымдық берілді. Алдағы үш жылда жалпы құны 3,7 трлн теңгені құрайтын 62 инвестициялық жобаны жүзеге асыруға ниеттіміз. Осы жылдың өзінде 175,2 млрд теңгеге бағаланған 30 жоба іске қосылып, мыңнан астам жаңа жұмыс орны құрылды. «Жібек жолы» арнайы экономикалық аймағы ірі инвестициялық жобалар алаңына айналды. Бүгін іске қосылған «Alstom kazakhstan» компаниясының техникалық қызмет көрсету депосы Шу ауданының стратегиялық маңызын арттырып, еліміздің теміржол инфрақұрылымын дамытуға, транзиттік әлеуетін нығайтуға зор үлес қосатынына күмән жоқ», дейді Е.Қарашөкеев.
Мамандардың айтуынша, Шу қаласында орналасқан жаңа депо KZ4 және KZ8 электровоздарына қызмет көрсетуге арналған. Мұнда айына жүзден астам локомотивті жөндеуге мүмкіндік бар.
«Әр локомотивті жөндеу үшін депо қызметкерлері шамамен 12 сағат уақыт жұмсайды. Алдағы бірнеше жылда мұндай сервистік деполар Алматы, Астана қалаларында және Арыста ашылады. Бұл өз кезегінде сала жұмысын ілгерілетуге ықпал етеді. Сондай-ақ жаңа жұмыс орындарын құруға да мүмкіндік береді», дейді компанияның қызмет көрсету бойынша директоры Олжас Ахметов.
Жаңа кәсіпорын жұмысы халықаралық стандартқа негізделген. Мұнда өнеркәсіптік және экологиялық қауіпсіздік талаптары қатаң сақталады.
Жамбыл облысы,
Шу қаласы
