Баянауыл ұлттық паркі
Баянауыл ұлттық паркінің ғылыми қызметкерлері Торайғыр көлінің солтүстік-шығысындағы тастақ жерлерден қарақұрт жұмыртқаларын тапқанын мәлімдеді. Демек жаз маусымында қауіпті жәндіктің қайта шығу ықтималдылығы бар.
– Тастар арасында улы өрмекшілердің жұмыртқалары бары анықталды. Жәндіктер қыста тастардың қуысына кіріп жан сақтайды да, күн жылына жер бетіне шығады. Айрықша қорғалатын жер болған соң, парк аумағында химиялық өңдеуге рұқсат жоқ. Жұмыртқаларын қолмен жинап, құтыға салып өртеп жібереміз. Былтыр шамамен 30 га жерде осындай іс-шараларды атқарғанбыз. Алдағы апталарда мамандарымыз жұмыртқаларды жоюға қайта кіріседі. Сондай-ақ Торайғыр ауылдық округінің әкімдігіне ескерту хат жібердік. Олар өздеріне тиесілі жерлерді өңдеуі керек, – дейді ұлттық парктің ғылым және мониторинг бөлімінің ғылыми қызметкері Мұрат Жасұлан.
Қарақұрт осымен ұлттық парктен үшінші жыл қатарынан табылып отыр. Қызметкерлер 2023 жылы 1593 жұмыртқа мен қарақұрттың 356 ұрғашысын жинап, жойса, былтыр 523 жұмыртқа мен 124 ұрғашысы өртелген.
Баянауыл ауданының әкімі Ардақ Кісентаевтың айтуынша, Торайғыр ауылдық округіне қарасты жерлердің біраз бөлігі (Ұлттық паркке тиесілі емес жерлер) қарақұртқа қарсы химиялық өңдеуден өтеді.
– Бұл мақсатқа бюджеттен 1,8 млн теңге бөлініп, мердігер таңдалып қойды. Өткен жылы тамыз айында қарақұрт қаптап кетуіне байланысты төтенше жағдай режімін жариялауға мәжбүр болғанбыз. Биыл ерте қамдандық. Өңдеу іс-шараларын екі рет жүргізу қарастырылған. Былтыр 150 га жер өңделсе, биылғы шама да содан кем болмайды, – деді А.Кісентаев.
Қарақұрт адамға өте қауіпті. Дәрігерлер егер қарақұрт шағып алса, бірден медициналық көмекке жүгінген абзал дейді. Медициналық көмек келіп жеткенше қарақұрт шаққан жерді 2-3 минут күйдіруге болады. Ол жәндіктің улы әсерін жояды.
Павлодар облысы,
Баянауыл ауданы,
Торайғыр ауылы
