Таныстырылымның ашылуында Ұлттық киноны қолдау мемлекеттік орталығының басқарма төрағасы Құрманбек Жұмағали аталған кезеңнің салмағына тоқталды.
«Бүгінгі таныстырылымда Сараптама кеңесі ұлттық киноға сүбелі үлес қосатын жобаларды іріктеу үшін бар күшін салады деген сенімдеміз. Ұлттық кино – ұлттың рухани келбеті. Сондықтан мемлекет қаржысына түсірілетін фильмдердің мазмұны мен сапасы жоғары деңгейде болуға тиіс. Киногерлер бұл жауапкершілікті терең түсінеді деп ойлаймыз. Біз ашық конкурс өткізуге мүдделіміз. Барлық үдеріс тиісті сала – Мәдениет және ақпарат министрлігінің бақылауында», деді Қ.Жұмағали.
Ал Сараптама кеңесінің төрағасы Бауыржан Шөкенов кәсіби және әділ бағалаудың маңызын ерекше атап өтті.
«Әрбір жобаны мұқият қарап, оның идеялық мазмұны мен драматургиялық сапасын бағалаймыз. Мемлекеттік қолдауға лайық, мазмұны бай әрі болашағы зор жұмыстар іріктеледі деп үміттенеміз. Барлық бағалау кезеңдері бекітілген талаптарға сай әділ өтеді», деді Б.Шөкенов.
Естеріңізге сала кетейік, байқауға өтінім қабылдау 13 наурызда аяқталды. Биыл көркем, деректі және анимациялық фильм секцияларында барлығы 444 өтінім келіп түсті. Оның ішінде 357 жоба Сараптама кеңесінің қарауына жіберілді. Бағалау нәтижесінде 128 сценарий мен сценарий жоспары екінші кезеңге өтті. Құжаттардың толық пакетін тапсырған соң 99 жоба питчингке жолдама алды.
