Чехияда шығарылған L-410 ұшағы – еуропалық «Aircraft Industries» компаниясының көп мақсатқа қолданылатын турбовинттік әуе кемесі. Кабинасы Garmin-3000 авионика жүйесімен жабдықталған. Мұндай жүйе навигациялық дәлдікті арттырып, ұшуды барынша қауіпсіз етеді. Заманауи ұшақ 19 адамды немесе 2-3 тоннаға дейін жүк тасымалдай алады. Ең жоғары ұшу жылдамдығы – сағатына 417 шақырым. Әуе кемесі 50°C-дан +50°C-ге дейінгі экстремалды температура жағдайында ұша береді.
Төтенше жағдайлар министрі Шыңғыс Әріновтің айтуынша, ұшақ министрлік құрамындағы авиациялық қызметтің жеделдігін арттырады. Екіншіден, төтенше жағдайларда жедел әрекет ету мүмкіндігін кеңейтеді. «Ұшақ бортында заманауи зембілдер, ауыр науқастарды тасымалдауға арналған жабдықтар, ұшу кезінде сырқаттардың өмірін сақтауды қамтамасыз ететін қосымша жабдық орнату мүмкіндігі бар», деді министр.
Мұнайлы өңірдің төрт ауданындағы елді мекендерде өрт сөндіру депосы ашылды. Қызылқоға ауданының Тасшағыл ауылындағы жаңа депо Көздіғара, Жамбыл, Қызылқоға ауылдық округтерін өрттен қорғау ісін қамтамасыз етеді. Жаңа нысанның тағы бірі Мақат ауданындағы Доссор кентінде орналасқан. Бұл депо 40 шақырым радиустағы 15 мыңнан астам адамның қауіпсіздігін қамтып, өрт, өзге де төтенше жағдайға ден қою уақытын едәуір қысқартады.
Бөкейхан ауылында іске қосылған жаңа депоның маңызы тіпті зор. Өйткені бұл ауыл Құрманғазы ауданының Ресей Федерациясымен шекарасындағы Қиғаш өзенінің жағалауында орналасқан. Су айдынының арғы бетінде Астрахан облысының ауылдары бар.
«Мемлекет басшысының азаматтық қорғау жүйесін нығайту, өңірлердегі қауіпсіздік деңгейін арттыру жөніндегі тапсырмасына сәйкес ауылдарда өрт сөндіру депосы ашылып жатыр. Мақсатымыз – кез келген төтенше жағдайға дайын болу, жедел әрекет ету. Бөлімшелер заманауи нысандармен, жаңа техникалармен қамтылатын болады. Бұл төтенше жағдайдың алдын алуға, зардабын тез жоюға ықпал етеді», деді Ш.Әрінов.
Атырау облысының әкімі Серік Шәпкенов атап өткендей, шалғай ауылдардағы өрт сөндіру деполары заман талабына сай жарақтандырылып жатыр. Елді мекендердегі өртке қарсы инфрақұрылымды нығайту жалғасын табады.
«Өрт сөндірушілердің алаңсыз жұмыс істеуіне толыққанды жағдай жасалды. Мұның бәрі төтенше жағдай кезінде шұғыл әрекет етуге, кәсіби тұрғыда шыңдалуға, азаматтардың қауіпсіздігін қамтамасыз етуге септігін тигізеді. Сондай-ақ сала мамандарының әлеуметтік жағдайын жақсартуға да назар аударып отырмыз», деді С.Шәпкенов.
Өрт сөндіру депосы жергілікті бюджет есебінен салынған. Құрылысын мердігер мекеме – «Декор» ЖШС жүргізген. Жалпы аумағы 480 шаршы метр нысан тез құрастырылатын жоғары сапалы модульді конструкциялардан тұрғызылған. Ғимаратта диспетчерлік, демалыс, ас бөлмелері, оқу сыныбы, екі өрт сөндіру техникасына арналған жабық тұрақ бар.
Төтенше жағдайлар министрі Ш.Әрінов жергілікті өрт сөндірушілерге 27 жаңа техниканы салтанатты жағдайда тапсырды. Оның 22-сі – түрлі сыйымдылықтағы цистернасы бар өрт сөндіру техникасы. Сондай-ақ төтенше жағдайлардың салдарын жоюға арналған жабдықтармен қамтылған АСА-20 апаттық-құтқару, байланыс және жарықтандыру, жанармаймен жабдықтайтын, биік ғимараттардағы өртті сөндіруге арналған механикалық саты орнатылған АЦЛ-30, манипулятор-эвакуатор, АКП-70 VEMA автокөтергіші, АСО-20, Trackol Vega-409 техникалары бар.
Атырау облысы
