Батыс Қазақстанда КПО б.в. компаниясына 7 млрд. теңге айыппұл салынды

ОРАЛ. 22 маусым. Батыс Қазақстан облысында шетелдің КПО б.в. компаниясы біраз жылдан бері көмірсутегі шикізатын өндіруде. Өңірдің ауданаралық экономикалық соты аталған компанияға экологияны ластағаны үшін 7 млрд.-тан астам теңге көлемінде айыппұл салу туралы шешім шығарды. Бұл туралы egemen.kz тілшісі хабарлады. КПО б.в.-ның өндірісі тұтастай алғанда ел экономикасына мұнай-газ секторынан түсетін тиімділік пен пайданың үлесін көбейтуге септігін тигізе алады. Алайда, компания альянсы өз еркімен ауаны ластайтын заттарды шығаруға жол беріп жатса, ол тиімділік пен пайданың құны көк тиын болып қалмасына кім кепіл?! Өйткені, мұндай жағдайда жергілікті тұрғындардың денсаулығына оның теріс әсері тиюі әбден мүмкін. Сонымен қатар, мұның өзі еліміздің экологиялық заңдылықтары мен талаптарына да қайшы келеді. Қарашығанақ кеніші аумағында газды алау жағу мен техникалық жағдайға байланысты оның бұзылу көріністері орын алды. Оны Батыс Қазақстан облыстық экология департаменті өткен жылдың желтоқсан айында жоспардан тыс тексеру жүргізген кезде анықтады. Соған сәйкес аталған департамент сотқа тиісті талап-арыз жолдады. Өз кезегінде Батыс Қазақстан облыстық ауданаралық экономикалық соты КПО б.в. компаниясынан 7 млрд. 286 млн. 716 мың теңге өндіру жөнінде шешім шығарды. Темір Құсайын. Дерек: egemen.kz. Сурет: uralskweek.kz.