Қала әкімдігі келтірген ресми дерекке жүгінсек, қазіргі кезде облыс орталығында қоныстанған халықтың саны 480 мыңнан асты. Іргедегі Байзақ, Жамбыл аудандарынан 14 ауылдың қала қатарына қосылуының арқасында шаһар тұрғындарының саны жарты миллионға жуықтады. Жергілікті халықтың саны артқан сайын Таразда қолға алынатын жобалар мен атқарылатын жұмыстар легі де көбейе түсті. Сол тұрғыда жергілікті атқарушы билік өкілдері барын салып жұмыс істеп жатыр.
Тараз қаласының әкімі Бақытжан Орынбековтің айтуынша, облыс орталығында екі ауданның құрылуы шаһардағы жұмыстарды сапалы жүйелеуді, халыққа көрсетілетін қызметті тиімді ұйымдастыруды, қаланы оңтайлы басқаруды, қордаланған өзекті мәселелерді дер кезінде шешуді қамтамасыз етеді. Сондай-ақ бұқара мен билік арасында ашық диалог орнатуға мүмкіндік береді.
Мемлекет басшысы Қасым-Жомарт Тоқаев өңірлердің ирригациялық жүйесін барынша жақсарту мәселесін назарда ұстап отыр. Содан да болса керек, жергілікті атқарушы билік өкілдері бұл мәселені назардан тыс қалдырған емес. Президент тапсырмасын жүйелі түрде жүзеге асыруға ден қойған өңір басшысы Ербол Қарашөкеев қала аумағындағы 6 ирригациялық, 2 дренаж каналды механикалық тұрғыдан тазалаудың маңызына басымдық беруінің арқасында қалалық қазынадан қаражат қарастырылып, тиісті жұмыс қолға алынған болатын. Нәтижесінде, жылдар бойы жыр болған «Түйте» каналының түйткілі шешілді.
«Өңір басшысы Ербол Қарашөкеевтің тапсырмасына сәйкес өткен жылы Тараздағы жалпы ұзындығы 60 шақырымнан асатын 8 каналға механикалық тазалау жұмысы жүргізілді. Каналдардың абаттандыру жұмысы да назардан тыс қалған емес. Біз қаладағы каналдарды тазалап қана қоймай, оның айналасын жасыл желекпен көмкеріп, төңірегін түгелдей абаттандыру мәселесіне де басымдық беріп отырмыз. Оған жергілікті халық куә. Бұл өз кезегінде тұрғындардың алаңсыз тынығуы мен серуендеуіне мүмкіндік туғызса, екіншіден, ағын судың канал бойымен кедергісіз ағуына мүмкіндік береді. Қолға алынған ауқымды жұмысты барынша жүйелі түрде іске асыру – басты мақсатымыз», дейді Тараз қаласының әкімі Б.Орынбеков.
Аумағынан бірнеше канал өтетін еліміздегі жалғыз қала Тараз екені баршаға белгілі. Сол іргелі каналдардың маңайын қолдан келгенше жасыл желекпен көмкеріп, абаттандыру жұмысын жүргізудің маңызы зор. Сол арқылы облыс орталығында қала тұрғындары серуендейтін жаңа мәдени демалыс орындардың қарасын арттыруға әрі көне шаһардың жаңа келбетін қалыптастыруға болады. Қазірде жергілікті атқарушы билік осы мәселеге айрықша басымдық беріп отыр. Нәтижесі көңіл көншітеді.
Тұрғындар талай жыл бойы жырлаған «Түйте» каналының төңірегін реттеу – қолға алған жұмыстың айқын нәтижесі. Еліміздегі ең ірі шағын аудан саналатын «Ұлы далада» қазіргі кезде 45 мыңнан астам халық қоныстанған. Одан бөлек, каналдың маңайында «Бурыл» тұрғын алабының халқы тұратынын ескерсек, жергілікті тұрғындардың саны еселене түсетіні анық. Жалпы ұзындығы 1 шақырым 738 метрді құрайтын каналдың бойы қазіргі кезде жергілікті тұрғындардың бос уақытта серуендейтін демалыс аймағына айналды. Бір сөзбен айтқанда, қала билігі ауқымды жобаны жүзеге асыру арқылы екі бірдей мәселенің шешімін тапты.
Ресми дерекке жүгінсек, «Түйте» каналын қалыпқа келтіру жұмысы «Сервис Құрылыс» ЖШС-ның мердігерлігімен жүзеге асты. Жобаның жалпы аумағы – 34,7 мың шаршы метр, оның 9,1 шақырымы – жаяу жүргіншілер жолы. Жаңғыртудан өткен каналдың айналасы талапқа сай абаттандырылған. Сондай-ақ су арнасының жағалауы көгалдандырылды, тиісті жабындылар төселіп, тұрғындардың тынығуына арналған орындықтар қойылды.
Тараздағы ауқымды жұмыстар мұнымен тоқтап қалмақ емес. Ресми дерекке сенсек, қала билігі енді «Үшбұлақ» каналына уақыт сұранысына сай жаңғырту жұмысын жүргізуді көздеп отыр. Канал үстіне көпір салу жоспарланған. Су арнасының 1,2 шақырымы жаңаша кейіпке енбек. Сондай-ақ каналдың айналасын «Түйте» каналы секілді көгалдандырып, жергілікті халық серуендейтін саябаққа айналдыруға басымдық берілмек. Мұнда воркаут, спорт алаңшалары, зейнеткерлерге арналған арнайы аумақ салынады. Осылайша, жергілікті атқарушы билік тағы бір жобаны жүзеге асырмақ.
Қалай алып қарасақ та, соңғы жылдары облыс орталығын көркейту жұмысы қарқынды түрде жүргізіліп жатыр. Қалада «Ұлы дала» шағын ауданының бой көтеруі «Бурыл» тұрғын алабында қоныстанған халыққа тиімді болды. Мұнда бірнеше көшеге жаңадан жол салынды. Жаңа бағыттағы қоғамдық көліктер пайда болды. Сондай-ақ халық сұранысына сай жаңа әлеуметтік нысандар бой көтерді. Бір сөзбен айтқанда, жаңа шағын ауданның салынуы қаланың тыныс-тіршілігіне тың серпіліс әкелгені талас тудырмайды.
ТАРАЗ
