Фото: ОКҚ
Облыс прокуроры Нұрғалым Әбдіровтің айтуынша Президенттің бастамасымен қайтарылған активтер есебінен өңірде әлеуметтік инфрақұрылым жаңғыртылып, тұрғындар игілігіне қызмет ететін бірқатар нысан салынып жатыр.
«Солардың бірі – бүгінгі ауызсу жүйесі. Көптен күткен бұл жобаның іске асуы – халықтың өмір сапасын арттыру жолындағы нақты қадам», деді құттықтау сөзінде Н.Әбдіров.
Облыс әкімдігінің мәліметінше ауызсу жүйесінің құрылысын «Пырақ-Құрылыс» ЖШС жүргізді. Қазіргі уақытта 75 үйдің ауласына ауызсу құбыры тартылды.
«Бұл күнді ұзақ күттік. Бүгінгі күн – тек қуаныш емес, тарихи сәт. Ауылымызда осындай игілікті іс атқарған Мемлекетімізге, басшыларға шексіз алғысымды білдіремін!», деді ауыл ақсақалы Кендебай Оңғарбаев.
Еске салайық, Мемлекет басшысының тапсырмасына сәйкес Жамбыл облысында қайтарылған активтер есебінен 15 ауызсумен жабдықтау және 4 денсаулық сақтау нысанының құрылысы қаржыландырылды.
