Фото: kz.qaj.kz
Премьер-министр елімізде жол мәселесі әлі де өзекті екенін атап өтті.
«Биылдың өзінде біз республика бойынша 13 мың шақырым жолды жөндеуден және реконструкциядан өткіземіз. Ол өте ауқымды жұмыс. Жаңа жолдар да салынып жатыр, мысалы, «Ақтөбе-Ұлғайсын», «Жезқазған-Қарағанды», «Жезқазған-Петропавл» және тағы басқалар. Жақында өздеріңіз білетіндей, Мемлекет басшысы орталықтан батысқа қарай үлкен автожол дәлізін салу туралы тапсырма берді. Біз осыдан тура бір ай бұрын жұмыстарды, яғни Астана қаласынан Ырғызға қарай жолды салуды бастадық. Бұл жол Торғай өңірінің, әсіресе Арқалық қаласының дамуына өте үлкен серпін беретін жоба. Өйткені, осы жол да, Жезқазғаннан Петропавлға баратын жол да Арқалық қаласы арқылы өтеді. Бұл бизнестің дамуына, осы өңірлердегі тұрғындардың өмір сапасының артуына үлкен мүмкіндік береді. Сондықтан біз әрине бұл жұмыстарды жалғастыра береміз», деді Премьер-министр.
Сондай-ақ Олжас Абайұлы Қазақстан жолдары Еуропа елдерімен салыстырғанда неліктен кемшін түсіп отырғанын айтты.
«Қазақстанның жері кең байтақ болғандықтан жолдың өзін салу үшін қомақты қаржы, мықты инвестиция керек. Мысалы Еуропалық елдерді алсақ, олардың жер аумақтары соншалықты үлкен емес, сондықтан да онда инфрақұрылымдарға да көп қомақты қаржы жұмсалмайды. Ал бізге бұл жағдайда ірі инвестициялар қажет. Сонда да болса, біз бұл жұмыстарды тоқтатпай, кезек-кезеңімен іске асыратын боламыз», деді ол.
