Ақтауды асқақтатқан аламан

Ақтау қаласының әкім­дігі, халық­ара­лық ТҮРКСОЙ ұйымы және Қазақстан Жазу­^­шылар одағы бірлесіп ұйым­дас­тырған халықаралық әде­би ынтымақтастықты дамыту мақсатындағы фестиваль­ға Қазақстан, Қырғызстан, Өзбекстан, Әзербайжан, Түр­кия, Түрікменстан мем­ле­кет­­тері­­нен 20-40 жас ара­лы­­ғындағы қалам­герлер қа­тысты. «Проза», «Поэ­зия», «Драма» жанрлары бойынша атал­ған елдерден
59 талап­кер қаты­сып, қазылар 12 жүйрікті анықтады.

Ә.Кекілбайұлы атындағы облыстық тарихи-өлкетану музейіне саяхаттан соң фес­тиваль Қ.Сыдиықов атын­дағы облыстық әмбебап кітап­ханада әдеби форуммен жал­ғасты. Форумда ақын, мемле­кет­тік сыйлықтың иегері Свет­қали Нұржан «Көркем әдебиет және Түркі әлемі», ақын Шерхан Талап «Түркі елдері әдебиетінің байланысын ны­ғайту және жастар әде­биетін қолдау», жазушы Ырысбек Дәбей «Қазіргі түркі әдебиетіндегі аударма мәселелері», ақын Асылан Қуанышұлы «Заманауи түркі халық­тары поэзиясы және Цзян Жуңның «Бөрі Тотемі» кітабы», ақын Бақ­тыбай Жайлау «Әбіш Кекіл­байұлының түркі дүниесіне қызметі» тақырыбында баяндама жасады. Әр жанр бойынша үздік қаламгерлер марапатталды. Драма жанрында Мұрат Қолғанат, Поэзия жанрында Шерхан Талапұлы, Проза жанрында Нұрбек Нұржанұлы
1 орынды иеленді.

Әдеби форум ақындар айтысына ұласты. «Маңғыстау – түркі мәдениетінің төрі» атты республикалық коман­далық айтыс­тың ақтық сайысында Айтбай Жұмағұлов жетекшілік еткен Қарағанды және Бекарыс Шойбеков бастаған Түркістан облысының командалары бақ сынады. Сөз шеберлері сүре мен түре айтыста қоғамдағы өзекті мәселелерді өткір сынаса, өтірік айтыс пен қайым айтыста қағытпа қалжыңмен көрерменге көтеріңкі көңіл күй сыйлады. Жыршылар қазақтың қаһармандық-тарихи жырларын қобыздың қоңыр үнімен тербеп, дом­бы­раның күмбірімен әрледі. Күйшілер күй тартысқа түсіп, дәстүрлі ән сайысы да ғажапқа қалдырды.

– Әр команда тек суырыпсалма өнерімен ғана емес, өз өлкесінің сазын, мақамын, бол­мы­­сын ала келді. Қос өңірдің өнер­паздарын бір-бірінен үстем деу қиын. Бастысы – халық­­тың көкейіндегі мәселе айтыл­­ды, ұлттық сана жаң­ғыр­ды, – деді қазылар алқа­сы­ның төрағасы Нұртөре Жүсіп.

Екі жылға созылған рес­пуб­ликалық командалық айтыста Қарағанды мен Түркіс­тан командалары тең түсіп, 1 орын­ды өзара бөлісті. 2 орын Астана қаласы мен Ақтөбе облы­сына бұйырса, 3 орынды Қызыл­орда мен Солтүстік Қазақ­стан облыстарының ақындары қанжығасына байлады.