Сурет: tolqyn.kz
Мамандардың есебінше, жаңа жабдық магистралды арналарда су деңгейі төмен болған күннің өзінде 6 мыңнан астам гектар жерді суарып тұруға мүмкіндік береді. Сорғы стансалары магистралды және шаруашылықтар аралығындағы арналардан ішкі шаруашылық желілеріне су жіберуге қолданылады.
Өңірде 126,4 мыңнан астам гектар жерге суармалы егін егілген, оның 82,4 мың гектары күріш. Ағымдағы суару маусымында жоспарланған су көлемі 2,5 млрд текше метр құрайды.
Облыс әкімдігі «Қазсушар» РМК-ның Қызылорда филиалымен бірлесе арнайы мониторинг тобын жасақтап, Сырдариядан келіп жатқан су көлеміне сәйкес, бес магистралды және үш шаруашылықтар аралығындағы арналарға су беру кестесін әзірлеп, бекітті.
Қызылорда облысының агроөнеркәсіптік кешені трансшекаралық су ресурстарына тікелей тәуелді екенін ескере отырып, өңірді тұрақты түрде сумен қамтамасыз етіп, астық өнімділігі әрі азық-түлік қауіпсіздігін сақтау – мемлекеттің басты міндеті болып қалады.
